Вмер русиньскый писатель Михаіл Чухран

Із Підкарпатя пришла смутна вість, же 13-го юла 2023-го року перестало бити сердце русиньского писателя і актівісты Михаіла Чухрана. Люди го знали як чоловіка гумору, а він до остатньой хвілі повный гумору а доброго настроїня і быв.

Народив ся Михаіл Чухран 23-го новембра 1954-го року в Королеві на Підкарпатю. На Ужгородьскій державній універзіті закінчів Хемічну факулту, і за тым фахом робив наперед у Львові, пак в Хусті, де ся приженив.

По пару роках перебрав ся жыти до родного Королева, де зістав аж до смерти. Робив у виноградівскій містьскій телевізії Виноградов-ТВ, одкыль ішов на пензію. В телевізії быв автором і ведучім множества проґрамів, в тім чіслі і русиньскых, наприклад Фіґлі тыжня, Наша бесіда, Сріберні струны.

Меджі тым писав віршы, гуморістічны але і філозофічны, котры вже меджі народом стали штось як фолклор. І до послідньой хвілі людей обвесельовав своїма віршами, фіґлями на сіті Facebook. Його творы мож было чути на різных фестівалах, концертах, але і в школах ці матерьскых школах, бо творив і про діти, а дітей барз любив.

Кедь у 2016-ім році зачав на Підкарпатю выходити културно-белетрістічный журнал Отцюзнина, Михаіл Чухран од початків быв єдным із авторів, котры в нім публіковали. І теперь, в першім чіслі, котре якраз вышло по дакількорічній перерві, Чухран быв меджі авторами журналу.

Так само творы Чухрана были друкованы в шторічній публікації Алманах днешньої русинської літературы, якый выдає Закарпатьске областне научно-културолоґічне общество імени Александра Духновіча і Русиньскый културолоґічный клуб. Тексты Михаіла Чухрана мож было чітати і на сайті rueportal.eu.

Михаіл Чухран мав выданы і властны книгы, а сам быв выдавательом і редактором многых публікацій. Як сьме вже споминали, писав про дорослых і діти. З його пера вышла і публіцістіка ці історічны статі. Публіковали го і Русины поза граніцями Підкарпатя – в Чеській републіці, Словакії, Румунії ці Мадярьску.

Нелем літературно актівізовав ся Михаіл Чухран в русиньскім русі на Підкарпатю. Быв актівный і в русиньскых обществах. Быв головов Виноградівского общества імени Александра Духновіча. Стрічати го люди могли на многых русиньскых подіях, конференціях, презентаціях, фестівалах ці на памятмых подіях, котры містны Русины орґанізовали.

Русиньска література пришла смертьов Михаіла Чухрана і великый талент, і барз плодного автора. Вічная память!

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА