17. липця 2014 рока вмер Семан Мадзелян, лемківскій писменник. Мал 92 рокы.
Был автором слів до знаной лемківской співанкы – “Під облачком”, музыку до нєй скомпонувал Ярослав Трохановскій.
Семан Мадзелян вродил ся 18. лютого 1922 рока на Лемковині в селі Білцарева. Был наймолодшым сыном Василя і Александры зо Щамбурів. Старшых братів родиче послали до шкіл, зас Семана задумали оставити на ґаздівці. Коли пришла війна, в 1940 році был зосланий на роботы до Німец. В 1945 році, як вельо молодых хлопців з Лемковины, был забраний як “доброволец” до Червеной Арміі. Воювал о освободжыня Чех. Был тяжко ранений в пражскій офенсиві. Лікувал ся долго, а коли в 1946 році вернул до рідного села, не нашол уж свойой родины. Вшыткы были переселены на Украіну. Лишыл ся при сусідах, з котрыма о рік, в 1947 році был выгнаний, як праві вшыткы Лемкы в рамках “Акциі Вісла” на понімецкы землі західньой Польщы. Там жыл в селі Тшмєль, коло Любіна на Дольным Шлеску.
Своі літерацкы тексты друкувал в книжочках пн. “Смак долі” і в ґазеті “Наше Слово”.
Інтервю зо Семаном Мадзеляном мож было слухати і в радийо ЛЕМ.фм.
.
Коментарі