Вмер владыка Симон
Як поінформувала єпархіяльна канцелярия, днес рано вмер Його Высокопреосвященнійший Кыр Симон, Архієпископ Лодзіньскій і Познаньскій.
Архієпискою Симон (Романчук) народил ся 12. серпня/авґуста 1936 рока в підляшскій Гущевині. В 1955 році завершыл педаґоґічний ліцей в Більску Підляшскым і зачал філолоґічны студиі в Міньску. Вернувшы до Польщы, вчыл росийксого, білоруского, латиньского языків. В 1965 році был принятий на ІІ рік теолоґіі на Християньскій Теолоґічній Академіі. В своій альма матер покійний оборонил докторску дисертацию. Початком 1970 рока был менуваний кєрівником Митрополитальной Канцеляриі. Того самого рока 11. лютого/фебруара был пострижений на монаха. О штырі дни был высвячений на діакона, а 22. лютого/фебруара на священника. 25. листопада/новембра 1979 рока был воздвиджений в сан архімандриты. О ден, в катедральным соборі св. Мариі Магдалины в Варшаві был хіротонізуваний на люблиньского єпископа, вікария варшавско-більской єпархіі. 18. серпня/авґуста 1981 рока был покликаний на владыку Лодзіньского і Познаньского. В 1995 році піднесений до ранґы архієпископа. Владыка выкладал на Лодзіньскым Універстиері. Архієпископ Симон был любительом східньославяньской культуры, посеред котрой выокремлял і цінил сой Лемків.
Похоронны Богослужыня пройдут в катедральным соборі св. Александра Невского в Лодзі в найблизшу суботу, 1. липця/юлия. Тіло покійного владыкы спочне на православным теметові в Лодзі.
Ґорлиці 106,6 MHz
Коментарі