Вмерла Олґа Ґлосікова, перша директорка русиньского музея

Як інформовала родина, в середу 24-го апріля 2024-го року у віці 71 років вмерла Олґа Ґлосікова, перша директорка Словацького народного музея – Музея русиньской културы в Пряшові.

Народила ся ПгДр. Олґа Ґлосікова, др. н., 24-го марца 1953-го року. Была родачков із русиньского села Камюнка, Старолюбовняньского окресу. Высокошкольскы штудії абсолвовала на Філозофічній факулті Універзіты Павла Йозефа Шафарика в Пряшові, в шпеціалізації філозофія – історія.

По штудіях зачінала як учітелька на ущілищу в місті Світ. Пак стала фаховым асістентом на Высокій школі технічній в Кошыцях із резідованьом в Пряшові, днесь Технічна універзіта в Кошыцях.

У 1990-ім році кандідовала до словацькой части Сеймовні народів Федералного згромаджіня (єдна із двох палат чехословацького парламенту), за Комуністічну партію Словакії, котра была теріторіалнов частьов Коміністічной партії Чехословакії. До парламенту наступила аж додаточно, у октобрі 1991-го року. В парламенті была до юна 1992-го року, коли одбыли ся далшы парламентны вольбы.

По куртій політічній карьєрі далше была высокошкольскым педаґоґом на Технічній універзіті в Кошыцях з резідованьом в Пряшові. У 2005-ім році здобыла тітул доктора наук на Філозофічнім інштітуті Націоналной академії наук Білоруси. Публіковала высокошкольскы учебникы з філозофії, реліґіоністікы, псіхолоґії, соціолоґії роботы і манажменту, соціолоґії і промысловой псіхолоґії.

Ку 1-му януару 2007-го року офіціално выникнув Словацькый народный музей – Музей русиньской културы. На директора той інштітуції быв выписаный конкурз, котрый на кінцю фебруара 2007-го року выграла Олґа Ґлосікова, і стала так першов директорков русиньского музея. На тій посаді была до апріля 2019-го року.

Ґлосікова мусила інштітуцію почати будовати од фундаменту. Музей не мав ани збірковы фонды, а ани будову. Музей під їй веджіньом быв у арендованых просторах одкрытый про людей у фебруару 2008-го року.

У 2011-ім році подарило ся здобыти про музей будову, де даколи были касарні. Музей пак быв, жебы ся перебрати до новой будовы, котра потребовала ставебно приспособити ся холем дакус, од апріля 2012-го року запертый, а то аж до децембра 2013-го року, коли ся отворив про навщівників.

Олґа Ґлосікова вступила з музейом у 2012-ім році до Округлого стола Русинів Словакії. Почас свого діяня па посаді директоркы подарило ся їй выбудовати першы постоянны експозіції музея і зачати повнити збірковы фонды. Вічная память!