Войновый цінтерь в Стропкові став Народнов културнов памятков

Войновый цінтерь із Першой світовой войны в Стропкові став Народнов културнов памятков. Стропків так має уж десять обєктів записаных в тім списку. Інформує о тім офіціалный сайт міста.

Місто цінтерь вєдно із каплічков зреконштруовало у 2018-ом році, при нагоді сторічніці закінчіня Великой войны. „Я барз радый, же із ініціатівы Крайского памяткового уряду в Пряшові, і наслідно на основі рішіня Памяткового уряду Словацькой републікы прибыла в Стропкові далша Народна културна Памятка, і то войновый цінтерь із погрібнов каплічков,“ повів пріматор міста Стропків Ондрей Брендза.

Векшыну творять австро-угорьскы вояци

Войновый цінтерь находить ся на теріторії містьского цінтеря і є вызначным історічным нерухомым документом, котрый припоминать войновы операції і їх ничівы резултаты в окресі Стропків із Першой світовой войны.

На цінтері є похованых понад 700 вояків, причім при 690 мертвых познать ся їх державна приналежность. Іде о 647 автро-угорьскых і 43 російскых вояків. Векшына вояків похованых в окремых гробах впала на бойовім полю або вмерла в резултаті зранінь. В масовых гробах суть векшынов похованы жертвы холеровой епідемії.

Унікатный цінтерь Йожефа Лампінґа

„Із архітектонічного боку іде о унікатне архітектонічне діло вызначного мадярьского архітектра Йожефа Лампінґа, яке на теріторії Словакії не має аналоґії. Архітектонічна вартость цінтеря окрім продуманого концепту є і в його парціалнім архітектонічнім елементі – погрібній, холеровій класіцістічній Каплічці святой Варвары із 1832-го року,“ інформовав пріматор міста.

В рамках реконштрукції із 2018-го року быв на цінтері збудованый памятник жертвам Великой войны, котрый сімболізує крыла ангела, і на котрім є подля імен записаных 332 дотеперь ідентіфікованых похованых вояків.

Як пише місто на своїм офіціалнім сайті, Стропків і цілый втогдышній окрес быв у часах Австро-Угорьской імепрії важнов стратеґічнов теріторійов монархії. В передвойновім періоді, у 1911-ім році, місто стало центром воєньскых маневрів цілой северовыходной части імперії за участи понад 100-тісячовой армії.

В тутешнім каштелю быв втогды уквартельованый і наслідник трону – Франтішек Фердінанд де Есте.

„Общественна вартость цінтеря є і в тім, же на його теріторії суть бік по боці похованы вояци неприятельскых армій – австро-угорьской і російской. Іде о высокый прояв гуманности, котрый выходить із ідеї, же по смерти не є неприятеля,“ додав пріматор Брендза.