Вратуваны лемківскы іконы з XVIII ст.

Як подає сайт Історычного Музею в Саноку в остатнім часі вратуваны остали три іконы з XVIII ст., з чого дві то лемківскы іконы з церкви в Дошні і Завадці. Іконы повело ся одреставрувати завдякы проєктови, реалізуваному в Музею і фінансуваному Міністром Культуры і Нацийонального Дідицтва.

Іконы, выбраны до реновациі, од моменту коли іх придбано (т.є. вчас забезпечаня маєтку в роках 1947-49 по выселінях в рамках акциі «Вісла»), не были іщы консервуваны, зато консервация даных ниже ікон была необхідна:

ікона Божой Матери Умиленіє з Дошна (Лемковина), скорше датувана на XIX ст., але по детальній анализі вказало ся, же ікона была перемалювана. Під верхньом варством з XIX ст. находит ся ікона Божой Матери – Одигітрия, з XVIII ст.;
ікона св. Миколая з Завадкы (Лемковина), XVIII ст.;
ікона Божой Матери Умиленіє з Мычковців, XVIII ст., олтарна ікона;

Стан захованя ікон перед консервацийом был планний. Бракы малярской варствы обнимали 40% обшыри ікон. Окрем того, іконы наражены были на шкідливе діяня зофобасів, овадів з родины жуків, якы атакуют дерево, в тым примірі деревяны підобразя. З огляду на брак добрі выпосаженой консерваторской працовні, Музей змушений єст нанимати до консервациі зовнішні фірмы і особы. При реновациі двох лемківскых ікон робила консерватор діл штукы Варвара Бандурка, а третю одновила консерваторска працовня «Rearte» s.c. A. Piotrowski з Кракова.