Выголошіня 16. річника цілословеньского конкурзу Духновічів Пряшів 2015

Русиньска оброда на Словеньску (РОС), Окресный уряд, одбор школства в Пряшові выголошують 16. річник цілословеньского конкурзу в декламації русиньской поезії, прозы, властной творчости, малых сценічных форм і людового росповіданя – ДУХНОВІЧІВ ПРЯШІВ 2015. Kонкурз ся одбуде 16-го юна 2015 в Театрі Александра Духновіча в Пряшові (о 9.00 год.). В конкурзі можуть брати участь діти матерьскых і основных школ, штуденты середніх і высокых школ а так само дорослы – вшыткы декламаторы, котры на окресных, школьскых ці іншых поступовых змаганях досягли 1. місця.

Катеґорії ДП 2015

0 – діти МШ і школярі 1. класы ОШ

1 – школярі 2. – 3. класы ОШ

2 – школярі 4. – 6. класы ОШ

3 – школярі 7. – 9. класы ОШ

4 – штуденты середніх і высокых школ

5 – дорослы

Жанры ДП 2015

Вшыткы жанры будуть мати свої катеґорії од 0 до 5. на 16. ДП 2015 бы мали звучати русиньскы творы – поезія (од русиньскых авторів або переклады іншых авторів до русиньского языка), а так само проза, властна творчість, малы сценічны формы (театралны гры, сценкы) і людове росповіданя (гуморны пригоды, фіґлі). Є округла річніця од смерти А. Духновіча, зато бы было добрі, кебы т.р. зазвучала на ДП і його поезія.

Оцініня участників ДП 2015

Каждый участник 16. ДП 2015 дістане діплом і приналежну ціну. Вітязі будуть оціньованы одборнов поротов од 1-го по третє місце і буде выголошеный Лавреат 16. ДП 2015.

Подорожнє, кост про декламаторів і педаґоґічный допровод і ціны про вітязів забесбечіть главный орґанізатор конкурзу РОС і Окресный уряд, одбор школства в Пряшові.

Дорогы Русины, придьте до нашого театру підпорити нашы діти, молодеж і наше родне русиньске слово. Придьте затляпкати нашым декламаторам і іншпіровати їх до далшой наукы і пропаґації русиньской літературной творбы.

Акція ся реалізує з підпоров Уряду влады СР – проґрам Култура народностных меншын 2015.