Вышнє Німецьке – Ужгород є в реконштрукції за европскы грошы

Як інформує у своїй пресовій справі Фінанчный директоріат Словацькой републікы, одднесь, 14-го септембра 2015 р., ся зачало із реконштрукціов гранічного переходу Ужгород – Вышнє Німецьке на граніці міджі Українов і Словацьков републіков.

Тот перехід буде в части особный транспрот зреконштруованый в рамках сполочного словацько-україньского проєкту „Модернізація і реконштрукція гранічных переходів на словацько-україньской граніці“, котрый є імплементованый посередницьтвом „Проґраму черезгранічной співпраці ENPI Мадярьско – Словакія – Румунія – Україна 2007 – 2013“ і є співфінанцованый Европсков Унійов.

Причінов реконштрукції є подля пресовой справы звышіня комфорту выбавльованя подорожных і знижіня добы чеканя в особнім транспорті. Реконштрукчны роботы мають быти закінчены до кінця рока 2015 і не заставлять ход переходу. Фінанчный директоріат підкреслює, же в інтересі плынулого выбавльованя є потрібне дотримовати предписы і реґулацію транспорту на україньскім і словацькім боках граніці.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА