Выстава «Едні Варголь. 33 1/3»

Містецка Ґалерия Штукы в Ченстохові просит на выставу окладинок платен, запроєктуваных Енді Варгольом. Вернісаж буде проходил 8. червця/юнія т.р. о 18.00 год. Выставу обзерати буде мож до 10. липця/юлия т.р.

Енді Варголь, єден з найбільшых ідолів Америкы, Русин, на долгы рокы здомінувал імаґінацию медий і публикы. Был так інтровертиком, як і екстравертиком, та фурт жаждал розголосу. Был провокатором. Мал звык маніпулювати своім жывотописом – высылал журналистам што раз то інчы його версиі. Креувал свою ідентичніст і достоменніст. Знаний был з провокуючых выповіди і вводжыня в блуд своіх спілбесідників.

Найчастійше пише ся о Варголи як о творцю нового нурту в штуці – поп-арту, не єст то докінця правда, бо жанр тот выникнул скорше, але на певно Варголь єст його найбарже знаным амбасадором. Зове ся го тіж корольом поп-арту, што вказує його позицию в світі штукы XX ст. Техніку серіґрафіі довюл до перфекциі. Портретувал телевізийны звізды і звіды кіна, знаных політиків та, очывидні, символі американьской популярной культуры. Легко розпознавальний стиль выпрацувал сой через хоснуваня звельократнінь, сильных контрастів і упрощыня. Вельо з його робіт єст днес іконами сучасности: банька зупы Кампбель, портрет Мерилін Монро, або банан на окладинці платні The Velvet Underground & Nico. Тот остатній мотив єст ключом до выставы в Ченстохові. Єй куратором єст Пьотр Метз – музычний журналиста. Суґестия про тото, до чого односит ся выстава, находит ся в наголовку выставы – чысло 33 1/3. Колиси было легкє до одшыфруваня. Днес, з огляду на технолоґічны зміны, не до кінця зрозуміле. Чысло тото односит ся до скорости граня музыкы – темпа оборотів на минуту чорной ґрамофоновой платні. Чысло 33 1/3 має перенести публику в світ музыкы, котрой пристуніст в творчости Варголя являт ся сутю выставы.

Проєктуваня окладинок платен то єдна з меньше знаных обшыри творчости Варголя, яку зачал іщы в 40. роках. По роках, коли тиражы платен были вельомілийоновы, проєктуваня окладинок ідеальні вписувало ся в артистичний маніфест Варголя – зробліня штукы з масово продукуваных річы штоденного хоснуваня. Окладинкы Варголя то дуже більше як лем вид банана, днес уж іконічний. Початковы проєкты здают ся быти планно вытворены, на вельох дає ся видіти каліґрафічна криска. Пак приходит м.ін. залюбліня в експериментальным фотоґрафуваню. В 1971 р. Варголь запроєктувал правдоподібні єдну з найтяжше до выпродукуваня окладинок – правдивий замок од споден, вшытий в знимку джінсів. Такій выбір не чудує, – то ґачы, якы з увагы на свою ачий понадпоколіньову популярніст і масовіст, скоро стали ся єдном з ікон попкультуры XX ст., а выдуманы были, як раз, в Амерциі. Од 70. років являют ся характеристичны для Варголя контрастовы портреты.

Варголь запроєктувал вшыткого більше як 50 окладинок. На выставі буде мож видіти парудесят з них, в тым печатаны уж по смерти артисты, хоснуючы його штукы.