Выстава ікон в Коросні

Підкарпатскій Музей в Коросні од листопада/новембра т.р. до січня 2017 р. просит на выставу пн. В кругу ікон Єжы Войтовича. Експонуваны іконы навязуют до карпатскых ікон, якы походят з 2. пол. XVI i поч. XVII ст., а котрых ориґіналы видіти мож на експозициях в Історичным Музею в Саноку ци Музею-Замку в Ланцуті.

Карпаты оддавна были натуральном культуровом границьом. Спілістнували гев дві культуры: східня, звязана з візантийском традицийом, православьом, а од XVII ст. тіж з униятском, та західня, звязана з католицизмом. Ріжнорідніст обох традиций – східньой і західньой стала ся вызваньом і інспірацийом для вказаня єй через артисту, якій в своій творчости лучыт тоты традициі. Авторска выстава Єжы Войтовича єст пробом вказаня богатства і оддміности штукы, яка розвивала ся, сусідуючы попри собі на обшыри Карпат.

Выстава презентує пару найважнійшых іконоґрафічных тем, такых як: Нерукотворний Спас, Деесіс, Страшний Суд, ікона Софіі ци Божа Матір в виді Годеґетриі. Тот остатній то найстарший і найпопулярнійший іконоґрафічний тип представляючий Божу Матір з Дітятком на руці. Правом долоню Божа Матір вказує на Ісуса Христа.

Єжы Войтович – походит зо Санока, там тіж творит. Єст абсольвентом Академіі Красных Штук в Кракові. Од 1981 р. робит в Працовни Консервациі Забытків при Музею Народного Будівництва в Саноку. В аристичній діяльности сігат по такы формы як малярство, рисунок, ґрафіку та консервацию забытків. На своім конті мат вальо індивідуальных та ґруповых выстав в Польщы і заграницьом (Італия, Голядния, Словация). В обшыри консервациі штукы – серед чысленных його реалізаций – треба вымінити м.ін. консервацию поліхроміі з пол. XIX ст. в православній церкви в Команчы, реконструкцию іконостасу з XVIII ст. в грекокатолицкій церкви в Команчы, одреставруваня ґрупы ікон в монастырі в Яблочыні, в Округовым Музею в Білій Підляшскій та спілучаст в консервациі ґрупы ікон, рыхтуваных до выставы в Музею Народного Будівництва в Саноку пн. Карпатска Ікона.

Вернісаж выставы буде проходил 23. листопада/новембра т.р. о 18.00 год. в Підкарпатскым Музею в Коросні (ул. Пілсудкого 16, Коросно).