Вышній Земплін буде репрезентовати нове лоґо

Реґіон Вышній Зепмлін буде репрезентовати нове лоґо. При його творіню Областна орґанізація турісточного руху (ООТР) Вышній Земплін і Вышній Шаріш выходила з первістной верзії, котра ся хосновала до 2012-го року.

Лого подля Михаелы Здражіловой, выконной директоркы ООТР Вышній Землін і Вышній Шаріш, презентує вшыткы важны атрібуты той теріторії, котры суть упорядкованы до штирьох областей: історія, култура, природа і вода. Інформовала о тім аґнетура TASR.

„Головнов причінов, чом мы вырішыли про редізайн лоґа є то, же хочеме ся приспособити актуалным общественным і технічным трендам. Візуална ідентіта є барз важным елементом, котрый репрезентує реґіон. Нашым цільом было, жебы лоґо Вышнього Земпліна вызерало репрезентатівно і было якостно ґрафічно оброблене. Єдночасно сьме хотіли, жебы оддзеркальовало філозофію реґіону, котрый хоче быти лібералным ку формам презентації, але конзерватівным ку цінностям, котры суть з ним неоддумательно повязаны,“ повіла Здражілова.

В правій части лоґа видиме деревяный храм, на лівій стороні є латиньска буква P, котра своїм тваром строму має подля Здражіловой одказовати на найцінніше природне богатство Вышнього Земпліна, котрыма суть карпатьскы буковы пралісы в Полонинах.

„Спідня часть лоґа належыть воді, котра представлює далше найвекше богатство реґіону, ці уж в подобі Домаші або водного резервоару Старина,“ інформовала далше Здражілова.

Одказ на послідній елемент, котрым є култура, мож подля їй слов видіти в самім фаребнім обробліню лоґотіпу. Способ зображіня надвязує за словами Здражіловой на pop-art і його найславнішого представителя Енді Варгола, котрого родічі походили з Вышнього Земпліна, зо села Микова.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА