Выстава цінных візантійскых ікон в Римі

У 2025-ім році буде Католицька церьков святковати Святый рік. Юбілейный рік 2025 з моттом Путници надії, быв выголошеный булов Папы Римского Франціска, і є 27-ым рядным юбілейом роком в історії Католицькой церькви, другым в часі понтіфікату сучасного Вселеньского Архієрея.

Дікастерія про євангелизацію – Секція про основны вопросы євангелизації у світі, котра є одповідна за орґанізацію Юбілейного року 2025, вєдно із Ватіканьскыма музеями одкрывать теперь пяту подію в рамках ціклу Юбілей є култура, і то тыждень перед одкрытьом Святых дверей Базилікы святого Петра.

Од 16-го децембра 2024-го року до 16-го фебруара 2025-го року буде в Костелі святой Аґнесы в Аґоне (Chiesa di Sant’Agnese in Agone) в Римі сприступнена выстава ікон під назвов Іконы надії. Путь віры у Ватіканьскых музеях, котру кураторьскы вєдно приготовили Анна Піццамано і Петро Береш – родак із Підкарпатя, якый довгы рокы є робітником Ватіканьскых музеїв.

В прекраснім бароковім храмі на Піацца Навона (Piazza Navona), будуть навщівници годны безплатно обдивльовати вісемнадцять цінных візантійскых ікон, котры были выбраны із збірок Ватіканьскых музеїв. Іконы походять із Ґреції, Булгарії, Україны, Росії і Северной Македонії.

Выставлены іконы выникли в періоді од 15-го до початку 20-го столітя. Вызначнов є і їх тіполоґічна розмаїтость – вотівны іконы, літурґічны образы, тріптіхы, менолоґії.

Збірка ікон Ватіканьскых музеїв, котра є моментално дочасно неприступна, выникала стовкы літ вдяка дарункам ці аквізіціям. Од року 1762 почали ся тоты іконы зачленьовати до понтіфікалных збірок, конкретно до Святого музея Апостолськой ватіканьской бібліотекы, котру основав Папа Римскый Венедікт XIV. Теперь выбер з цінной збіркы буде мож видіти в рамках выставы Іконы надії. Путь віры у Ватіканьскых музеях каждый день од девятой годины рано до семой вечур. Вступ є безплатный.