XI Конкурс рецитациі лемківской поезиі в Ґорлицях

В пятницю, 20. мая т.р., Єпархіяльний Осередок Православной Культуры Ельпіс в Ґорлицях просит на XI Конкурс рецитациі лемківской поезиі. Подія зачне ся од 9.00 год. в будинку осередка (православна плебанія парохіі св. Тройці) при ул. св. Максима 2 в Ґорлицях.

Як і в попередніх едициях, в конкурсі возмут участ ученикы основных шкіл та ґімнаций. В ґорлицкым конкурсі лемківской поезиі выступуют школярі пунктів вчыня лемківского языка не лем з Лемковины, але, што єст уж традицийом, і з чужыны (напр. на попередні переслуханя іздили школярі з Ліґниці ци Любіна).

Основныма цілями конкурсовых рецитаций лемківской поезиі є підтримуваня языка, культуры і достоменности серед діти та лемківской молодежы. Попри тым, орґанізоторы, як і учытелі, звертают увагу на красу вказуваня лемківского поетичного слова. Жырі, в котрым засідают м.ін. учытелі лемківского языка, звертат увагу на лемківскій бесідуваний язык, деклямацию даного верша та дальшы формы выражаня поезиі. Стріча на конкурсі рецитациі лемківской поезиі, окрем того, являт ся добром змогом до взаімного познаня і інтеґрациі учеників з ріжных пунктів вчыня лемківского языка. (детальний реґулямін конкурсу до прочытаня в статі о влонишнім конкурсі).

Каждий, хто має дяку, може підпорити конкурс в подобі фундуваня нагорід, переводячы грошы на конто Єпархіяльного Осередка Православной Культуры Ельпіс, або переслати деякы дарункы, або чачка. Більше – на сайті Осередка Ельпіс.