В пятницю і суботу, 3. і 4. серпня/авґуста 2018 р., в Михалові на Нижнім Шлеску проходила XXXVIII Лемківска Ватра на Чужыні.
Традицийні зачала ся при памятнику жертв Акциі Вісла. Квітя зложыли м.ін. представникы державных і самоурядовых власти. В імени орґанізаторів, зо сцены, привитал присутных ведучий Стоваришыня Лемків – Андрий Копча, і спомянул, што тогорічна ватра проходит в ювілейным року – 100. річниці основаня Руской Народной Республикы Лемків. Андрий Копча попросил розпалити оген найстаршого жытеля села Михалів, долголітнього лемківского діяча – Ярослава Шляхтича.
В рамках офіцийной части прошол выклад Олены Дуць-Файфер про стремліня і намаганя Русинів Лемковины сотворити свій політичний проєкт на основі пляну для Европы придуманого американьскым президентом Вудро Вільсоном.
Потім зачал ся артистичний проґрам. Як перший выступил ансамбль Стоваришыня Лемків Ластівочка з Пшемкова і заспівал гымнічну пісню «Тяжко жыти на чужыні». Надзвычайні зворошаючом частю вечерніх выступлінь было вручыня нагороды ім. Никыфора за діяльніст в просторі лемківской культуры Мариі Стеранці-Трохановскій, лемківскій співачці, солистці ансамблю Лемковина з Білянкы.
Того дня выступили тіж Терочка – ансамбль Стоваришыня Руска Бурса, ґрупа Древутня, Rusnack’s з Пряшова, Секция з Пшемкова, а пізно в ночы на сцену вышол ансамбль Демай. Треба підкрислити, што в тій части ватряных концертів вызвучали чысленны авторскы творы по лемківскы. Терочка презентувала новы співанкы на слова лемківскых поетів, Секция – выключні авторскы творы (понекотры знаны з репертуару культового Братскладу!), а попис естрадового професийоналізму дал Rusnack’s. Они, окрем знаных русиньскых співанок в модерных аранжациях, заспівали фанковий «Красний ден» зо словами Зузкы Ковальчыковой.
В суботу выступили домашні ґрупы зо Середы Шлезской, Хоцянова і ансамбль Розтока з Рудной. Был проґрамовий блок, в якым презентували ся і наймолодшы артисты з Кычеркы, Ластівчата і Сонечка. Для наймолодшых зорґанізуваний был тіж конкурс співу, рецитациі і малюнку. Охочы дорослы могли брати участ в короткій дискусиі і історичным конкурсі на тему Руской Народной Республикы Лемків. Потім на сцені выступили фольклористичны ґрупы Передзвін з Калуша і Кычера з Ліґниці. В вечернім музычным блоку заграли запоряд ґрупы н’лем фольк з Вроцлавя, Крамбабуля з Познаня та Надія зо Шпротавы. Ватру закінчыла шумна забава до білого рана при музыці неповторного Оскара з Ґорлиц.
фото – Мирко Воргач. Фотореляциі з XXXVIII Лемківской Ватры на Чужыні за мотузком.
Коментарі