Як можу помочы Украіні? #помічUA / ч. 5

Война тырват уж більше як тыжден. Кыів і інчы украіньскы міста героічно борoнят ся перед окупантом. Мы, якы находиме ся в безпечній зоні, помагаме Украіні і біженцям. До той поры явило ся уж вельо ріжного рода ініциятив, не лем в Польщы, але і по цілым цивілизуваным світі.

Поміч громадянам Украіны несут і місцевости з обшыри Лемковины (і околичны). Як раз і місто Ґорлиці од самого початку заанґажувало ся в підтримку біженців і высловило рішучу солідарніст з Украіном.

Власти міста просят вшыткых, котры рішыли дати уж поміч втікаючым перед войном жытелям Украіны в формі мешканя, зголосити тот факт до Уряду Міста. В зголошыню треба подати такы інформациі як імено і назвиско, дату перекрочыня границі, місце побыту і дату, коли біженці были приняты, документ і телефонічный контакт до того, хто дає поміч з мешканьом. Готовый формуляр находит ся на сайті ґорлицкого повіту.

Уряд інформує, што створіня списку місц, в котрых находят ся біженці, дозволит запевнити ім не лем безпеку, але тіж одповідню медичну опіку, а в дальшій часовій перспективі доступ до едукациі для наймолодшых. Формуляр повинен быти пересланый майльом, на адрес: dlaukrainy@um.gorlice.pl, в двох языковых версиях.

Окрем того інформуєме, што одкрытый был єден центральный Повітовый Маґазин Помочы. Цілу добу ведена єст в ним збірка продуктів для жытелів Украіны. Пункт злокализуваный є в Воли Лужаньскій 31.