Як то ся робит і кус о Різдві. Свята давно і днес – ч. ІІ – «70%» – неділя, 18.00 год.

Ото сіджу і думам сой… Як то так єст, же рахуєме час од Різдва Христового, а святкуєме Новый Рік не на Різдво – ани 25. грудня, ани 7. січня, – а такой 1. січня… Но або 14. січня…

Но і взагалі – чом доднес сут тоты два Новы Рокы? Давно бы уж злучыли тот неясучый календар, же змылят ся штораз більше з тым ясучым – та і мали бы порядок, і в піст не мусіли бы сме справляти новорічны забавы. І в тот же ден і Різдво бы святкували сме, як чыслиме рокы од Різдва. Мали бы сме штырі свята в єдным – і был бы спокій!

І думам зас… Тот Санта Кляус то гейбы Святый Миколай… Но але чом він приходит не в ден святого Миколая, а на Різдво? А і позбераный Санта Кляус подібный до Діда Мороза, а не до Миколая, лем кус коротшый має кожух. І, видите, запрігат в сані пілнічных єленів. А правдивый Миколай, якій жыл в Турциі – то він хыбаль на верблюдах іздил…

І взагалі, тепер так выглядат, же Різдво то штоси такє, же конче треба на тот ден вшыткым купити дарункы – бо як раз тото найважнійше. А як звідую старых Лемків, то чую, же нихто жадных дарунків на Різдво не рыхтувал.

О, власні! Певно, пришла пора звідати старых Лемків, як то было, бо мі в голові уж вшытко ся вымішало. А як і о што іх звідувати, бесідуєме в днешній передачы.