З радістю інформуєме, же за діяльніст для зберіганя і розвитку лемківской достоменнтости, Президент Польской Республикы, Анджей Дуда, нагородил Ярослава Трохановского, основателя і долголітнього дириґента Лемківского Ансамблю Пісні і Танця «Лемковина», Золотым Крестом Заслугы.
Золотий Крест Заслугы то державне одзначыня, надаване од 1923 р. за выходячы шыроко поза простір штоденных обовязків вызначны заслугы для державы, або громадян, діяльніст, ідучу на хосен державы, або громадян, за діяня в публичній обшыри, несіня помочы і благодійну актывніст.
Стріча з маестром Ярославом Трохановскым в Рускій Бурсі (2012 р.). Фото: архів лем.фм
Ярослав Трохановскій то найвыдатнійший лемківскій творця музыкы, композитор, дириґент, вызначний мультіінструменталиста, але тіж народний діяч, писатель і пречудовий інтерпретатор вершів Івана Русенка, оддавна званий єдным словом – МАЕСТРО.
В 1969 р. основал ансамбль «Лемковина», котрий в часах, коли Русины были выняты комуністами з офіцияльного публичного простору, был інституцийом, яка выховала соткы співаків, музыків і діячів, плекаючы, підтримуючы і розвиваючы лемківску достоменніст в найтяжшых ґу тому часах. О тым, як тяжко было орґанізувати по Акциі «Вісла» лемківксє жытя, бесідує Маестро в єдным з нашых архівальных радийовых джінґлів:
Од 1983 р. під крылами «Лемковины» были орґанізуваны, днес уж завлащены через чужых Лемкам ідеолоґів, Лемківскы Ватры, котры в оных часах были не лем нагодом приіхати на рідну землю, але мали величезне інтеґрацийне і соспільне значыня для Русинів по пілнічній стороні Карпат.
Ансамбль «Лемковина», в середині – Ярослав Трохановскій
За свою роботу на ниві лемківской культуры, Маестро Ярослав Трохановскій был вельократні доцінений, м.ін.: одзнаком Заслужений Діяч Культуры, нагородом Князя Константина Острогского, нагородом Мосты Старосты і другыма.
Ярослав Трохановскій того рока скінчыл 75 років (біоґрафія – за тым мотузком). Радийо лем.фм мало нагоду быти в Маестра в ден його ювілею, тым більше і днес тішыме ся з признаного державного одзначыня – Золотого Крестa Заслугы.
На многы і благы літа МАЕСТРО!
Коментарі