Ясюнка, Крива, Баниця – в неділю упамятніня бывшых жытелів сел

В найблизшу неділю, 9. червця/юнія в Ясюнці одбуде ся історична подія – посвячыня Пропамятного Креста, якій буде нагадувал бывшых жытелів трьох сел. То спомнена уж Ясюнка, а до того сусідня Крива і Баниця.

Всітри села были насильно выселены польскыма комуністичныма властями в рамках акциі «Вісла» точно 77 років тому – як раз в червци/юнію 1947 р.

Подія заплянувана є на дві части. Перша з них зачне ся о 11.00 год. Божеском Літургійом в православній церкви Покровы Пресвятой Богородиці в Ждыни. Богослужыня очелит владыка Паісий, архієпископ православной перемышльско-ґорлицкой єпархіі, якій поблагословил діло орґанізацийного комітету одкрытя Пропамятного Креста.

Пак присутны участникы підут до Ясюнкы, де владыка при участи священників і вірных посвятит памятник.

Ініциятором одкрытя памятника єст Михал Гайтко, потомный Ясюнчан, якому по 28 роках старань повело ся одзыскати незаконно забрану вітцівску землю. Пропамятный Крест станул як раз на земли, котру держава оддала правильному ґазді.

Ясюнчане перед выселіньом частично приналежали до православной церкви – доходили до часовні в недалекій Баници. Селян выгнано в рамках акциі «Вісла» 9. червця/юнія 1947 р. Подля офіцийных даных (спис приправленый комуністичныма властями) выселено 182 особы. Ясюнчане трафили м.ін. в околиці днешніх Студзьонок і Рудной, але тіж до волівского повіту на Нижнім Шлеску. З Баниці выгнано 57 осіб – тіж в реченым періоді.

Криву выселяно в подібным часі – депортувано 156 осіб. В Кривій до выселіня находила ся грекокатолицка парохія свв. Космы і Даміяна (церков побудувано в 1924 р.). Кривяне трафили м.ін. в околиці Шпротавы.

На памятнику выписано вшыткы роды, якы до 1947 р. заселяли Ясюнку, Криву і Баницию. В недільных упамятнінях участ возмут жытелі Лемковины, а тіж потомны выселеных, што днес прожывают на чужыні – західніх землях.