Єпархія в Пармі одсвятковала 50 років

Ґрекокатолицька єпархія в Пармі, котра належыть під русиньску Піттсбурзьку ґрекокатолицьку метрополію в неділю 23-го юна 2019-го року одсвятковала 50-ту річніцю од свого заснованя.

На торжестві брало участь окрім домашнього єпарху, владыкы Мілана (Лаха), далшых 18 католицькых єпіскопів, включно кардінала Леонарда ді Сандрі, префекта Конґреґації про восточны церькви з Рима.

Дводньовы святкованя

Ґрекокатолици в Пармі зачали своє торжество уже в суботу. В рамках проґраму была путь родин і молодежи до Церькви Святого Духа, панахіда на містнім цінтері, вечурня в Катедралнім соборі св. Йоана Крестителя ці парастас.

Головным пунктом празднованя была недільна архієрейска Божественна літурґія, котру в пармскім катедралнім соборі служыв архієпіскоп Віліам (Шкурла), метрополіта піттсбурзькый. Проповідь мав префект Конґреґації про восточны церькви кардінал Леонардо ді Сандрі.

Окрім священиків єпархії брали на святкованю участь і далшы єпіскопы з Америкы і Европы, як і священици зо старого краю. Участный быв і мукачівскый єпарха Мілан (Шашік), торонтьскый єпарха Mаріян Андрей (Пацак), котрый єднако як і пармскый єпарха походить із Словакії, ці емерітный єпарха Пармы владыка Джон (Кудрік). За Кошыцьку ґрекокатолицьку єпархію взяв участь на річніці протосінкел єпархії, архімандріта Ярослав (Лайчіак) і бывшый протосінкел Владимір Томко.

Пармска єпархія

Пармска ґрекокатолицька єпархія, котра є русиньсков церьквов, выникла 21-го фебруара 1969-го року булов Папы рисмкого Павла VI. Christi Ecclesia. За першого єпарху быв выменованый владыка Еміл (Мигалик). Тот быв рукоположеный в новозрядженім Катедралнім соборі св. Йоана Крестителя в Пармі 12-го юна 1969-го року.

Владыку Еміла рукоположыв першый метрополіта Піттсбурґу, кедьже в тім часі, кедь выникла єпархія в Пармі, Піттсбурґ быв піднятый на метрополію, владкыа Стефен (Кочішко), вєдно із єпіскопом Майклом (Дудіком) з єпархії Пассаік і втогдышнім владыком – апостольскым візітатором ґрекокатоликів у Канаді Михалом (Руснаком).

В часі выникнутя мала єпархія юрідікцію і над цілым западом Споеных штатів Америкы. В році 1981 была зряджена четверта епархія в рамках метрополії – Ван Нуіс, котра має свій центер од 2009-го року у Фініксі, значіть теріторія Пармы ся зменшыла.

Єпархія має днесь вдяка великій намазі єпіскопа Джона (Кудріка) о обновліня традічного восточного монашества женьскый Монастырь Хріста Жениха в штаті Огайо, в ареалі котрого є і путницьке місце Маріяповчаньской Богородіці. Парма зрядила і Ґрекокатолицькый културный центер, выдавать властный часопис Horizons (Горізонты). Єпархія має єдну із малого чісла ґрекокатолицькых церьковных школ в Споєных штатах Америкы – в Клівленді. Богословы єпархії штудують в метрополітній богословскій семінарії в Піттсбурзі.

Дотеперь были в Пармі штирьоми єпіскопы – Еміл (Мигалик), Ендрю (Патакій), Басіл (Шотт) і Джон (Кудрік). Од 2018-го року є пятым єпархом Мілан (Лах), котрый уж рік перед тым быв выменованый за адміністратора єпархії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА