Папа римскый Франциск в суботу 7-го апріля 2018-го року меновав отця Авела Сочку із Чіну святого Василія Великого за єпархіялного єпіскопа Ніредьгазькой єпархії Мадярьской ґрекокатолицькой церькви. Сочка быв апостольскым адміністратором єпархії од 2015-го року. Быв і протоіґуменом василіяньской Провінції святого Штефана в Мадярьску.
Народив ся Авел Антал Сочка 24-го септембра 1972-го року у Виноградові. По закінчіню середньошкольской освіты абсолвовав богословскы штудії в Будапешті. У 1995-ім році вступив до Чіну святого Василія Великого в Мадярьску. Вічны обіты мав у 2001-ім році, в тім самім році быв і рукоположеный на священика гайдудорозьскым єпіскопом Сілардом Керестешом.
У 2008-ім році быв отець Авел Сочка капітулов выбраный за протоіґумена споминаной провінції, душпатырьску роботу выконовав у Будапешті і в путницькім місці Маріяповч. В році 2016 быв знова выбратый за протоіґумена.
Од року 2015 быв призначеный за апостольского адміністратора Ніредьгазькой ґрекокатолицькой єпархії sede vacante. Од того часу, хоць без єпіскопского рукоположіня, быв отець Авел Сочка, ЧСВВ членом Рады єрархів Мадярьской ґрекокатолицькой церькви, котра є метрополітнов церьквов.
Єпархія в Ніредьгазі была зряджена 20-го марца 2015-го року. То было повязане із выникнутьом метрополітной церькви. Екзархат в Мішколці быв втогды підвышеный на єпархію і Гайдудорозька єпархія была підвышена на архієпархію, причім центром архієпархії став Дебрецин.
Головов архієпархії є архієпіскоп і метрополіта Петер Філіп Кочіш, єпархом в Мішколці є владыка Атаназ Орос. Владыка номінант Авел Сочка буде першым єпархом Ніредьгазькой єпархії.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі