ЮНЕСКО в Квятони

В Кракові в днях 2.-12. липця/юлия т.р. проходит 41. сесия Комітету Світовой Спадковины ЮНЕСКО. В звязку з тым гості тырваючого конґресу одвиділи вчера, 6. липця/юлия, м.ін. ґорлицкій повіт – заявило Ґорлицкє Староство на своім офіцийным сайті.

Гості, якы пришли на ґорлицку землю, то выдатны специялісты з обшыри охороны людской спадковины. В рамках візиты одвиділи храмы, якы сут вписаны на Листу Світовой Спадковины ЮНЕСКО, а заєдно находят ся в списку Шляку Деревяной Архітектуры в Малопольщы. Серед візитуваных храмів нашла ся і лемківска церков. Участникы сесиі пришли найперше попозерати на костел св. Михала в Бінаровій, якій на листу был вписаний в 2003 році. На місци витал іх віцестароста Єжы Налепка, якій передал ім анґлицкоязычны фольдеры дотуляючы ґорлицкого повіту.

Єдным з пунктів делеґациі было одвиджыня середньолемківской Квятони, в якым находит ся перлина лемківской церковной архітектуры – храм св. Параскєвы, вписаний до списку ЮНЕСКО в 2013 році. Делеґаты признали, што речены обєкты не сут лем архітектонічным кушмтом, але тіж вписуют ся в місцевий краєвид і свідчат люди, якы ту жыют, та культуру реґіону. Гості одвиділи тіж костел св. Леонарда в Липници Муруваній. Друга медженародна ґрупа приде до ґорлицкого повіту о два дни, 9. липця/юлия. Окрем церкви св. Параскєвы в Квятони на Листі Світовой Спадковины ЮНЕСКО находят ся іщы два храмы з ґорлицкого повіту, церкви Покровы Пресвятой Богородиці в Рыхвалді і св. Михала в Брунарах.