З Чертіжного вже потягли драгу на граніцю. На драгу до Яслиск ся іщі чекать

Як інформує денник Korzár, драга меджі русиньскым селом Чертіжне в окресі Меджілабірці і граніцьов Польщі є вже докінчена. Драга мать в будучности споїти Чертіжне зо селом Яслиска на польскім боці.

Староста Чертіжного привітав, же по десятках років ся зо словацького боку зробила драга і має надію, же поможе турізму. На польскім боці є з граніці до Яслиск коло 6,5 кілометра. Драга є там зроблена, як повів Петро Трічак про нашу редакцію, лем на даякых 2,5 кілометрах од села.

„Реконштрукція той драгы є ключова при далшім турістічнім розвитку нашого села, трасу лемує веце новых ці зреконштруованых турістічных алтанків на нашім і польскім боці, уможнить напоїня на меджінародны ціклотрасы як і ліпше споїня з нашым партнерьскым селом Яслиска,“ конштатовав староста Трічак про денник Korzár.

Драгу зробили скоріше

Драга в Чертіжнім належыть під Пряшівскый самосправный край. Докінчіли єй скоріше як было плановане. В контракті із фірмов, котра мала драгу реалізовати, было записаных 60 календарьных днів на роботу. Фірма наконець драгу зреалізовала скоріше.

Вытрати на комунікацію, котра веде із Чертіжного на граніцю з Польщов были подля контракту 167 748 евр. В рамках головных ставебных робот на дразі ся вырівнав підклад камінями, на што ся положыв асфалтовый макадам.

Хотять тісну співпрацу

З Яслисками хоче за словами Трічака Черзіжне надвязати тісну співпрацу, што не мож без драгы. Хоць є лем 9 кілометрів меджі тыма селами, автами мусять теперь ходити довкола, што то є понад 50 кілометрів.

По выбудованю драгы на словацькім боці і зачатку робот на польскім боці Трічак вірить, же слідуючій рік бы могли перейти першы авта по новій дразі.

„Хочеме, жебы ся розбігнув турізм. Тоты локаліты суть близкы, што до русиньского языка, і кедь векшына людей была одтыль (з Яслиск, позн. ред.) в повойновім періоді выселена інде. Зато там дакус порожніша теріторія,“ повів недавно староста про денник Korzár.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА