З выглядковой вежі над селом Удол мож видіти Любовняньскый град

В Пряшівскім краю прибыла нова выглядкова вежа. Тот раз над Удольсков скалков в катастрі села Удол, Старолюбовняньского окресу. Як інформовало Одділіня комунікації Пряшівского самосправнеого краю (ПСК), ку выбудованю поміг і край через свій ґрантовый проґрам.

На нову триштокову выглядкову вежу дав Пряшівскый самосправный край дотацію в цілковій сумі 20 тісяч евр з проґраму Вызва про реґіон. Проєкт реалізовав ся вєдно із реконштрукційов біціґльового алтанку, котрый є близко вежі.

„Цільом выбудованя триштоковой выглядковой вежі з вышков 14,2 метра на цілковій вымірі 17,64 метрів квадратных было звидительніня села і звекшіня потенціалу в одношіню ку турістам і навщівникам,“ інформовало Одділіня комунікації ПСК.  Выглядкова вежа є близко біціґльовой стежкы, котра капчать Удол із селом Плавеч. Найвысшый шток дає навщівникови панораматічный погляд на села околіці як Плавніця, Громош, Люботин, Шарішске Ястрабя, Гайтівка, а так само на градну вежу Любовняньского граду.

Проєкт новой выглядковой вежі при русиньскім селі Удол, у Любовняньскій верьховині, реалізовав ся в літніх місяцях 2023-го року. На будованя хосновав ся як основный матеріал смерек. Реалізаторы думали і на то, же вежа будує ся в русиньскім реґіоні, і так є означена і в русиньскім языку.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА