За нами ІV Карпатскій Фільмовий Фестіваль

Од минулой пятниці 4. вересня проходил в Тысній ІV Карпатскій Фільмовий Фестіваль, о котрым інформували сме вас гев.

Вчас той тридньовой імпрезы высвітленых остало вельо цікавых фільмів, тыкаючых ся шыроко понятой карпатской темы, реалізуваных през ріжны державы світа, напр. през Словацию, были то фільмы: Ladomírske morytáty a legendy (реж. Петер Керекес, 1998), Farebné kamienky (реж. Юрай Ябубіско, 2002), Осадне (реж. Марко Шкоп, 2009), Jozef a jeho bratia (реж. Анна Главачова, 2009). Украіньской продукциі высвітлены остали фільмы І біль, і памят – через рокы (Мария Тройчак, 2014), Отец Кадило (реж. Тарас Бабенчук, 2012). Вказано тіж чешско-словацко-украінськой продукциі фільм Уйко Віктор (реж. Віктория Рампаль Дзуренко), німецкій фільм Абсолют Варголя (реж. Станіслав Муха, 2001), польскій Portret Rusina z artystą w tle (реж. Войцєх Олейнічак) і американьску продукцию Three stories of Galicia (реж. Ольга Онишко & Сара Фаргат, 2010).

Показ фільмів одбыл ся в суботу, a в неділю пришол час на пару авторскых стріч, м.ін. зо Станіславом Криціньскым (автором напр. Cerkwie drewniane w Karpatach, Bieszczady. Tam gdzie «diabły, hucuły, ukraińce» і інчых), Здзіславом Скроком (Czy wikingowie stworzyli Polskę?, Wielkie rozdroże. Ćwiczenia terenowe z archeologii wyobraźni, Skarby małe i duże і вельо інчых) ци Валерийом Падяком (автором напр. Нарису істориі карпаторусиньскоі літературы XVI–XXІ століть, выдавцьом – смотр padyak.com) і концерт ансамблю Лемко Блюґрас Бенд.

В пятницю проходила популярно-наукова конференция під назвом «Карпатскє етнічно-культурове погранича», котру, як радийо лем.фм, сме записали. Бесідували: Станіслав Дрозд, якій коротко оповіл про приватний Музей Культуры Бойків в Мычкові, др габ. Ева Міхна бесідувала про карпаторусиньскій рух на Підкарпатскій Руси, Даміан Новак представил стан захованя церковной архітектуры на обшыри польскых Карпат в роках 1939-2015, а Богдан Гук бесідувал про антикомуністычний рух опору на Лемковині в роках 1945-47 в польскій історийоґрафіі. Вшыткы выголошены выступліня і іщы додатковы, тых прелеґентів, якым не повело ся доіхати до Тисной, найдут ся в альманаху, якій од того рока мат печатати Музей Лемківской Культуры в Зындранові, а неодолга част прелекций выемітуєме на антені радия лем.фм. О термінах будеме вас інформувати.

Окрем конференциі, того самого дня на фестівали одбыл ся вернісаж образів Кшыштофа Мончыньского з Лупкова і Мирослава Гаврильця з Мокрого, а під вечер показ сляйдів Pictograph Мішы і Ліды Сухий та Łem-Ukryta Kraina авторства Адриана Спулы.