За тамтом гором – Антоний Крог

Онедолга буде мала премєру лемківска книжка Антония Крога пн. За тамтом гором. Стоваришыня Руска Бурса в Ґорлицях заповідат тіж промоцию книжкы і стрічу з автором.

Нова польскоязычна книжка Антония Крога то оповіданя про Лемків, котры столітями жыли в Низкым і Сандецкым Бескідах. В роках 1945-1946 част была «добровільно-насильным» способом переселена на Украіну, а в 1947 р., вчас акциі «Вісла», вшыткы інчы депортуваны і розселены в малых ґрупах на Західніх Землях. Чытаме про тых, котрым з трудом подарило ся вернути, хоц уж не на своє, о приспособліню ся до неприязных реалий Польской Народной Республикы, о першых концертах ансамблю Лемковина, о лемківскых зъіздах – Ватрах, привязаню до традициі, культуры, языка. Автор пише о непростых вопросах – лемківскє дзеркало одбиват і польскы проблемы.

Антоний Крог то польскій історик культуры, етноґраф, тлумач словацкой і чешской літературы. Працувал в Татряньскым Музею в Закопаным і новосандецкым музею. Єст орґанізатором карпатскых конкурсів атристичной народной творчости, комісарьом выстав – «Лемкы», «Духы епохы, то єст перша світова война тырват доднес», «Спиш» і другых. Вельолітній спілпрацівник писма Інституту Куншту Польской Академіі Наук – «Польска Народна Творчіст», академічний выкладовця в Collegium Civitas. Опубликувал м.ін. етноґрафічне студиюм Сучасна народна різба Польскых Карпат, книгу Склеп культурных потреб про культуру Підгаля, збірку есеів – Про Швейка і про нас. Єст автором нового польского тлумачыня Долі доброго вояка Швейка часів войны світовой Ярослава Гашека.

Выдавництво «Іскры» выдало скорше дві книжкы того автора – Староріча і Веселого Алилуя Народня Польщо!