Зачнуть реконштрукчны роботы на далшій части Любовняньского граду

Роботы на реконштрукції далшой части Любовняньского граду зачнуть приблизно о місяць. Як про аґентуру TASR потвердив директор Любовняньского музея Далібор Микулик, зготовительови буде ставба передана 5-го септембра 2023-го року, роботы бы мали быти закінчены до 18-ох місяців.

Цілковы кельчікы на реконштрукчны роботы суть 1,2 міліона евр, з чого 650 тісяч пришло як дотація з Міністерства културы Словацькой републікы, решту зафінанцує Пряшівскый самосправный край, котрый є зряджовательом музея.

Зачати хотять штонайскоріше

„Зачінаме далшу велику і складну реконштрукцію граду, тотраз іде о северовыходну стіну, впаджену охоронну стіну граду, плус цілый третій двір. Частьов проєкту є і презентація археолоґічной локаліты воєньскых касарень, часть застрішіня і одводніня цілого третього двора,“ інформовав Микулик.

Подля директора музея є цільом зачати муровати штонайскоріше, жебы было доста часу на реалізацію робот іщі перед тым, як прийде мороз.

„Не мурує ся на градах, кедь ночна теплота знижыть ся під минус пять ґрадусів, вірю, же почас осени зробить ся фалат роботы. Дотеперь сьме при реконштруцкії трьох палаців граду все сприступнили тоту часть граду, котра ся не обновльовала, а іншак то не буде ани теперь. Неприступный буде лем третій двір, де того часу проходять выступліня соколярів, тоты перенесуть ся на другый двір. Остатні части граду будуть приступны,“ звернув увагу директор музея.

Іде о складну реконштрукцію

Микулик підкреслив, же обнова буде дуже складна, кедьже впаджену охоронну стіну граду треба поставити наново і забезпечіти статіку стіны.

Навеце, при будованю стіны мусять мерьковати, жебы не порушыли археолоґічну локаліту історічных касарень із 17-го столітя. Тоты были обявлены у 2011-ім році, кедь часть северовыходной стіны впала.

„Може при реконштрукчных працах обявить ся і штось нове і розкрыє ся далшый кусок історії граду, подобно, як то было при палаці Любомірьскых. При його обнові обявили сьме наприклад тоалету і чорну кухню,“ додав Микулик.

За словами директора в половині літньой турістічной сезоны суть з навщівностьов вынятково спокійны. Затля реґіструють нароснутя чісла турістів о 30 процент в порівнаню з єднакым періодом в минувшім році.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА