В звязку з пандемійом коронавіруса поєдны державы постепенно заперают своі границі. Перед парома днями своі переходы закрыла Словацка Республика і Польща. Самособом закрыты сут переходы, котры лучат Лемковину з Пряшівском Русю. Границю мож перейти лем в вынятковых ситуациях.
Од неділі, 15. марця 2020 р., вшыткы границі Польщы, котры до той поры были вільны од реґулярных контролі, в звязку з фунґуваньом зоны Шенґен, сут закрыты до свобідного переходу. Тыкат ся тото і граничной смугы, котра лучыт Лемковину з Пряшівском Русю.
На граници медже Польщом і Словацийом находят ся векшы і меншы переходы. Дотепер найбільшый рух на пасмі Лемковина-Пряшівщына был в такых переходах як Барвінок-Вышній Комарник, Конечна-Бехерів ци Мушынка-Курів. Але окрем них одкрыты переходы, котрыма дотля мож было свобідно переіхати автом або перейти піше, то м.ін. Бальниця-Осадне, Черемха-Четіжне, Яслиска-Чертіжне, Радошыці-Полота, Бліхнарка-Стебницка Гута, Явіркы-Литманова, Явіркы-Страняны, Шляхтова-Великій Липник, Лелюхів-Чырч, Милик-Леґнава, Ожынна-Нижня Полянка, Высова-Цигелька.
Вшыткы тоты переходы на днес сут стережены граничныма службами. Границю медже Польщом і Словацийом мож в вынятковых ситуациях перейти лем переходом Барвінок-Вышній Комарник (державный пут но. 19) і Хыжне-Tерстяна на Ораві (державный пут но. 7). Перейти до Польщы можут м.ін. польскы громадяне, котры хочут вернути з заграниці, а тіж чужынці звязаны з Польщом в професийный або родинный спосіб. Подібны вымогы окрислила Словация. Заєдно вшыткы, котры войдут на обшыр Польщы, мусят піддати ся 14-дньовій домашній кварантанні.
Границі медже Лемковином а Пряшівщыном были зас заперты по 13 роках. Тілько часу минуло, одколи Польща і Словация одкрыли своі кордоны на основі шенґеньского договору. Границі в найблизшых днях будут стережены пограничниками – як перед роками.
Коментарі