Замішанці і іх версия музикы русиньского племена…

Явили ся недавно, але уж намішали. Бесідуют, што сут сучасныма Замішанцями, што будут оповідати історию русиньского племена. Бесідуют, што в іпнотичным трансі іх музикы мож ся дослухати славяньскых мелодий Лемків, якы давно жыли на Коросняньскій Руси. Бесідуют, што енерґія нашых предків фурт вірує долинами і верхами Коростенка, Ванівкы, Ріпника, Опарівкы, Бонарівкы, Чорнорік… Бесіда з Яцком Уклейом, членом ансамблю Замішанці.

Хто творит Замішанців?

Каждый з нас професийні занимат ся чымси інчым, але доля так спричынила, што спільні твориме ансамбль, котрый одповідат нашым музичным заінтересуваням.

Одкаль сте?

Походиме з полудньово-східньой Польщы, а докладні з Коросна і околиц, але корені некотрых з нас сігают далеко на схід. Певно одтале може выходити охота, потреба оповісти о жытю на границі медже двома етнічныма обшырями – польском і русиньском.

Што мате спільне з Лемками/Замішанцями?

Жыєме в тій чудовій краіні, серед лісів, лук, гір, долин і потоків. Так як колиси Замішанці, вандруєме ньом і стрічаме памяткы по них. Жыючы в згоді з натуром, береме інспірациі до творіня. Тіж сме людми, котры пришли на тоту обшыр. Мож повісти, што сме сучасныма Замішанцями.

Што ся подіяло, же зачали сте грати?

Початково стрічали сме ся в камарата в хыжы в присілку Братківска Вілька на незобовязуючым граню. По якісым часі перешло то в реґулярны пробы, котры проходили уж в Реґіональным Центрі Культуры Погранича в Коросні. Через даякій час формувал ся наш склад, котрый тепер уж ся устабілізувал. Ансамбль творит 5 осіб (постати).

Не до кінця чую в Вашій музиці лемківскы/русиньскы навязаня, ци хоцкі славяньскы, што суґерувало бы названя ансамблю. Хыбаль што названя має замішати?

Думам, што нашым одкликаньом ся до той музикы в великій мірі сут співанкы. Аранжуєме іх в цікавый спосіб, хоснуючы етнічны інструменты зо світа. Співаме іх в ориґінальных языках, бо нич так як они не оповідат о тяжкым жытю на рубежах.

Выступуєте в масках, мож ся Вас в них зострашыти :). Чом не вказуєте лиця і так сильно ся переоблікате? Вашы концерты то радше видовиска?

Так, закладаме маскы, бо через маскы входиме в постати і духы ліса. Забераме слухачів і ведеме іх через тоту краіну, єдночасно оповідаючы правдиву історию русиньского племена. Нашы выступы то получыня концерту і видовиска. Музика, наше облечыня і сценоґрафія творят свого рода маґічну і таємничу атмосферу.

На кілько ставляте на інтеракцию з публиком, а на кілько на енерґію, яка творит ся медже самыма Вами вчас граня?

Барз важный є для нас контакт з публиком, котра ріжні реаґує на нашы выступы. Трафляло ся, што ціла саля гуляла як заіпнотизувана. То завдякы бубнам, котры вводят так само нас, як і слухачів в свого рода транс.

Де сте уж выступували? Якы пляны?

Од часу коли основали сме ансамбль, выступили сме уж парократні, нп. на Вельокультуровій Собітці над Вислоком, Лемківскым Музичным Літі ци фестівали Танец в Світлі та вчас Карпатскых Климатів в Коросні. Певністю будеме ся зосереджати на аранжациі новых творів і надієме ся, што уж в тым році будеме мочы оповісти нашу історию на пару фестівалях.

Як плянуєте/хочете, жебы розвивала ся Ваша музика? Являт ся тексты?

Сме отворены на ріжны напрямы, певністю хочеме вводити штораз більше корінной, славяньской музикы. Окрем того дальше будеме лучыти ритмы, грати на ріжных інструментах. Кєд іде о тексты, то маме зааранжуваных пару співанок Замішанців удоступенных Бартком Ґалонзком, нп. Під дубиною, під зеленою (Петруша Воля, співачка вр. 1930 р., награня з 2002 р.) ци Яворе, яворе, де з тебе конарі?. Будеме тіж зосереджати ся на рыхтуваню наступных.

Дякую за бесіду!

Замішанців найдете на:
zamieszancy.pl
facebook.com/Zamieszancy.Band
youtube.com