Запиште ся карпатьскыма Русинами, апелують америцькы Русины

Каждый ся рахує! То гесло кампані, з котров приходить Карпаторусиньскый дослідный центер в Споєных штатах Америкы перед переписом населіня.

В Споєных штатах перепис проходить вже тот рік. Од 1-го апріля 2020-го року бы поступно мали люди діставати формуларі, в котрых будуть записовати свої даны. Окрім іншого можуть зазначіти і свою народность.

Цензус в США

Цензус в Споєных штатах Америкы так як і в далшых держвах проходить раз за десять років. Покля в европскых державах є перепис населіня, аж на дакотры выняткы як Україна, напланованый на 2021-ый рік, жытелі Споєных штатів ся будуть раховати вже тот рік.

Фурмуларі будуть выповняти гражданы США, гражданы іншых держав, котры мають леґалну резіденцію в штатах, довгодобы навщівници, котры не суть гражданами але і нереґістрованы іміґранты.

Запиште ся карпатьскыма Русинами

Карпаторусиньскый дослідный центер вже зачав імейлову кампань перед переписом населіня, в котрій апелує на людей, жебы записали ся як Carpatho-Rusyn.

Творцьове кампані далше звертають увагу на то, же покля ся люди в односній колонці запишуть іншаков назвов, наприклад Slavic, Lemko, Carpatho-Russian або Ruthenian, не є ґарантоване, же будуть прирахованы ку карпатьскым Русинам. В кампані ся акцентує, же записати ся як карпатськый Русин є і офіціалнов позіційов Карпаторусиньского конзорціюма Северной Америкы.

В Споєных штатах Америкы є подля одгадів професора Павла Роберта Маґочія од 600 000 до 800 000 людей русиньского походжіня. За остатнім переписом ся там ку русиньскому походжіню приголосило лем 8 934 людей.

Карпаторусиньскый дослідный центер

Карпаторусиньскый дослідный центер є наукова інштітуція і выдавництво в Споєных штатах Америкы. Засновав го у 1978-ім році професор Павел Роберт Маґочій. Почас свого існованя выдав множество публікацій, брожур, мап. Од 1978-го до 1997-го року выдавав свій каврталник Carpatho-Rusyn American.

Центер забезпечує штіпендії про штудентів і науковців, котры занимають ся проблематіков карпатьскых Русинів. В роках 1993 аж 1995 рядив Фонд про русиньску молодеж Югославії. Од 1997-го року передавав Премію імени Александра Духновіча за русиньску літературу.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА