Засідав меншыновый выбор у новім складі

У віторок, 18-го юлія 2017-го року, в просторах Пресцентру Уряду влады Словацькой републікы в Братіславі проходило выняткове засіданя Выбору про народностны меншыны і етнічны ґрупы у його новім складі. Народностны орґанізації за окремы державов вызнаны народностны меншыны собі на трирічный період выберали своїх представителів 3-го юлія, україньска меншына своїх членів выбрала в доповнюючіх выборах 12-го юлія.

Членове выбору собі на засіданю перевзяли декреты о своїм членстві у выборі з правом голосовати і занимали ся далшыма двома основныма пунктами. Вольбов підпредседы выбору і вольбов єдного члена дозорной комісії нововыникнутого Фонду на підпору културы народностных меншын, котрый має од року 2018 перевзяти аґенду фінанцованя меншыновой културы як верейноправна інштітуція. Дотеперь фінанцованя было під ґесційов Уряду влады Словацькой републікы в рамках проґраму Култура народностных меншын.

Представителі Русинів у выборі – Петро Медвідь і Мілан Ян Піліп, на обидві функції пропоновали своїх номінантів. За підпредседу выбору, котрый ся выберать із членів, быв Русинами номінованый Мілан Ян Піліп, котрого номіновала і мадярьска народностна меншына. Далше на тоту функцію кандідовала Даґмар Такачова за чеську народностну меншыну і Павел Траубнер, котрый быв номінантом жыдівской меншыны з підпоров моравской меншыны. У двоколовій вольбі была за підпредседничку выбору выбрата Даґмар Такачова, яка у функції вычеряла Павла Траубнера. Тот быв підпредседом два функчны періоды – од заснованя Выбору про народностны меншыны і етнічны ґрупы у 2011-ім році. Підпредеда выбору є подля штатуту автоматічно і членом Рады влады Словацькой републікы про людьскы права, народностны меншыны і родову рівность.

За члена дозорной комісії у фонді быв русиньскыма представителями номінованый правник Любомір Кубічка. Далшыма кандідатами были Клавдія Секереш – номінантка мадярьской меншыны, котра є і членков выбору за тоту меншыну, Томаш Тілняк, котрого номіновала україньска меншына і Іґор Турук, котрый быв кандідатом Ромів. І в тім припаді проходила двоколова вольба, на кінцю котрой быв за члена дозорной комісії нового Фонду на підпору културы народностных меншын выбратый Іґор Турук.

Членове выбору на своїм засіданю занимали ся і вопросом алармуючого стану повязаного з пізніньом выплачаня грошей зо схваленых проєктів на тот рік в рамках проґраму Култура народностных меншын 2017. Дотеперь векшына орґанізацій на свої проєкты не дістала фінанції і жадателі мусять робити свої проєкты на довг або пересувати реалізацію проєктів на пізнішы даты. Председа выбору, котрым є уповномоченый про народностны меншыны і етнічны ґрупы, Ласло Буковскый, на засіданя закликав вшыткы директоркы окремых одборів, котры ся до той справы односять, жебы пояснили причіны сітуації. Єдночасно были предстаивтелі меншын убезпечены, же робітници односных урядів будуть робити вшытко, жебы грошы про жадателів были выплачены до кінця авґуста.

Ласло Буковскый далше членів выбору інформовав, же на слідуюче засіданя, котре є наплановане на половину септембра 2017-го року, буде буде запрошеный брати участь і нововыменованый директор Фонду про підпору културы народностных меншын  – Норберт Молнар. Членове з ним будуть годны діскутовати о проблемах дотеперішнього фінанцованя меншын з цільом, жебы в новій сістемі фінанцованя, котра буде функціоновати од слідуючого рока, передышло ся тым проблемам, котры меншыны мали коло робліня своїх проєктів і выплачаня грошей на тоты проєкты дотеперь.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА