Голосник

Зеленьскый посмертно нагородив владыку Шашіка. Нагороду дістав і православный метрополіта Феодор

Почас робочого подорожіня до Закарпатьской области Україны презідент републікы Володимір Зеленьскый вручів державны нагороды, котры уділив єпіскопови Мукачівской ґрекокатолицькой єпархії Міланови Шашікови, і метрополітови мукачівскому і ужгородьскому Україньской православной церькви Феодорови.

Інформовав о тім офіціалный сайт презідента Україны. Державны нагороды передав Зеленьскый в пятніцю 25-го септембра 2020-го року в Ужгороді.

Орден про владыку Шашіка

Голова україньской державы в пятніцю навщівив Хрестовоздвиженьскый ґрекокатолицькый катедралный собор в Ужгороді. Там Володимір Зеленьскый вручів орден За заслугы ІІ. ступня, котрым быв нагородженый владыка Мілан Шашік. Орден з рук презідента перевязв апостольскый адміністратор Мукачівской ґрекокатолицькой єпархії владыка Ніл Лущак.

Презідент державну нагороду уділив владыкови Міланови посмертно 20-го юла 2020-го року за многолітню плодну церьковну, благодійну і милосердницьку діялность. Владыка Мілан посвятив 160 храмів і каплиць, рукоположыв 154 новых єпархіалных священиків.

„Вдяка владыкови Міланови Шашікови Мукачівска ґрекокатолицька єпархія утвердила ся як єдна із найвпливнішых церьковных штруктур в области, має друге місце за кількостьов реліґійных орґанізацій і вірників,“ цітовав сайт презідента Зеленьского, котрый тоты слова выповів почас бісіды з єпіскопом Нілом і настоятельом катедралного собору Іваном Тидіром.

Нагородженый і метрополіта Феодор

Презідент Володимір Зеленьскый так само навщівив і Свято-Николаївску церьков в Ужгороді, де вручів орден За заслугы ІІ. ступня метрополітови мукачівскому і ужгородьскому Україньской православной церькви владыкови Феодорови (Мамусаєвови). Орден быв уділеный на основі наряджіня презідента із 21-го авґуста 2020-го року.

Метрополіта Феодор поміг розшыріню штруктуры єпархії і укріпліню кадрового потенціалу. Теперь має єпархія 358 реліґійных громад, 304 священиків, 15 монастырів і штири реліґійны братства. В Ужгороді діє Духовна академія імени свв. Кіріла і Методія. Єпархія помагать матеріално і духовно сиротинцям, школам-інтернатам і шпыталям.

Як повів нагородженый орденом владыка Феодор, є про нього досправды честь дістати нагороду з рук презідента.

Жрідло фотоґрафій: Офіціалный сайт презідента Україны.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі