Желізницьове получыня західньой Лемковины зо словацкым Попрадом

Правдоподібно літом 2019 р. зачнут ходити потягы медже західньом Лемковином а русиньскыма місцевостями аж по Попрад на Словациі. Што раз близше до одкрытя той меджедержавной інвестициі.

Остатніма днями в словацкій Жылині зобрала ся польско-словацка ґрупа до справ транспорту. Рішыла она, што уж літом 2019 р. підут потягы медже Креницьом (Мушыном) а словацкым Попрадом. Польску сторону репрезентувал консультант Маршалківского Уряду Малопольского Воєвідства.

Більшіст деталів є уж довершена. Схвалена має быти іщы розписка получынь, яка явит ся бодай в грудни/децембрі 2018 р. Пак зачне промоцийна кампанія. Проєкт підтримуют заєдно словацкє Міністерство Транспорту, Маршалківскій Уряд та власти словацкой желізниці.

Припомнийме, што договоры про одкрытя реченого получыня были ведены уж початком текучого рока. З ініциятивом вышло словацкє Міністерство Транспорту.

Оператором получынь буде малопольска желізниця, словацка страна оферує дати потягы. Будут то спалиновы склады, понеже на обшыри Словациі не всяди є тракцийна сіт.

Літом 2019 р. потягы будут ходити лем в вікенды. Думкодавці акциі уж днес голосят, што кєд лем заінтересуваня проєктом буде більше, то потягом медже Креницьом а Попрадом буде мож подорожувати тіж зимом.

Потяг ішол бы м.ін. через русиньскы місцевости так на Пряшівщыні, як і Лемковині. Правдоподібно міг бы затримувати ся в Старій Любовни, Плавци, Орлові, Лелюхові, Мушыні та быти може і в інчых селах. Польско-словацкє получыня має быти скомунікуване з потягами з інчых міст Польщы, м.ін. з Кракова, што гейбы причынит ся до збільшыня туристикы в реґіоні.