ЗІРС позывать на лекції професора Шворца до Братіславы і Кошыць

Здружіня інтеліґенції Русинів Словеньска (ЗІРС) як головный орґанізатор позывать вшыткых заінтересованых на лекцію професора Петра Шворца під назвов Русины і Чехословакія (рр. 1919–1939).

Лекції одбудуть ся в Братіславі і Кошыцях, і ЗІРС їх орґанізує у співпраці з Округлым столом Русинів Словакії, Інштітутом історії Філозофічной факулты Пряшівской універзіты в Пряшові, Чеськым центром Братіслава, Катедров історії Філозофічной факулты Універзіты Павла Йозефа Шафарика в Кошыцях і Публічнов бібліотеков Яна Бокація в Кошыцях.

В Братіславі буде мож выслухати лекцію 10-го децембра 2024-го року в просторах Чеського центра Братіслава, в Кошыцях подія одбуде ся о два дні пізніше, 12-го децембра в просторах Публічной бібліотекы Яна Бокація.

Лекції професора Шворца будуть скапчаны з презентаційов книгы Країньска граніця меджі Словакійов і Підкарпатьсков Русьов (рр. 1919–1939). Книгу выдало Здружіня інтеліґенції Русинів Словеньска в минувшім році. Є то доповнене і розшырене выданя тітулу, котрый першый раз Шворцови вышов у 2003-ім році.

Історік Петер Шворц довгы рокы у своїх научных баданях інтересує ся і темами русиньской історії. Книга, яка буде презентовати ся на тых двох подіях, выникла на основі вецерічного баданя в словацькых, як і загранічых архівах – в Празі, Бонні, у Відню. Были в ній схоснованы архівны матеріалы з архіву і депозітарів Народного музея в Празі.

Покля бы сьте мали інтерес быти участныма на лекції в Братіславі, з капацітных причін треба оголосити ся на імейловій адресі орґанізатора, яку найдете на плаґаті.