Зъізду не было – Русины сут

1. марця 2015 рока деякы росийско- і украіньскоязычны медиі пошырювали віст про зъізд русиньскых орґанізаций, котрий, подібно, мал проходити того дня. Як розписували ся медиі, на зъізді принято рішыня “жаданя вызнаня Русинів нацийональном меньшыном і домагати ся выполніня результатів референдум з 1991 рока дорогом діялоґу з властю в Кыйові”. В інформациях подавано, што, серед інчых орґанізаций, в реченій стрічы брала участ Народна Рада Русинів Закарпатя, Общество ім. Александра Духновича і інчы, котры рішыли сотворити Координацийну Раду Русиньскых Орґанізаций Закарпатя.

Євген Жупан, предсідатель Народной Рады Русинів Закарпатя – орґанізациі, котра зъєднує праві 90% русиньскых орґанізаций на Украіні, повіл нам, же 14. марця 2015 рока не проходил ниякій зъізд, стріча, ци сойм, в котрым брали бы участ представникы выміненых орґанізаций. Подля нього, пошыряны неправдивы вісти сут провокацийом, котра є частю зовнішньой антирусиньской політыкы.