Знаме уж склад Уряду Польской Республикы. Котре міністерство буде «од меншын»?

Днес, на прес-конференциі лідерів партиі Право і Справедливіст, на котрій выступили презес Ярослав Качыньскій і Беата Шыдло – новопокликана Премєр ПР, дознали сме ся о персональным складі нового Уряду Польской Республикы.

Нацийональны і етнічны меншыны та хоснувателі реґіонального кашебского языка ждали на інформацию, хто обыйме ресорт, котрий занимат ся меншыновыма справами, т.є. Міністерство Адміністрациі і Цифризациі? Повыборчы медияльны спекуляциі, в котрых неофіцияльні чули сме о плянах ліквідациі МАіЦ і влучыня го до Міністерства Внутрішніх Справ, не выполнили ся, хоц деякы зміны прошли. Новы два ресорты то Міністерство Внутрішніх Справ і Адміністрациі та Міністерство Цифризациі, зато являт ся звіданя – котрий міністер буде занимал ся меншынами?

Міністром Внутрішніх Справ і Адміністрациі остал Мариюш Блащак, а Міністерство Цифризациі обняла Анна Стрежыньска. Кєд являт ся даякы інформациі, котрий ресорт буде тым «од меншын» – будеме інформувати.