Знаме уж выконавців XXXV Лемківской Ватры на Чужыні!

Тогорічна Лемківска Ватра на Чужыні буде проходила в днях 7.-8. серпня  – там де все – на ватряным поли коло церкви св. Михала Архангела в Михалові на Нижнім Шлеску. Дотепер знали сме лем термін той прекрасной подіі, але днес маме змогу принести Вам афіш з назвами декотрых выконавців, котры выступлят на михалівскій сцені.

Орґанізаторы, як все, думают о каждым – і о старшых, і о молодшых. Такій є тіж проґрам. На Лемківскій Ватрі в Михалові найдете молодіжны ґрупы і фольклорны ансамблі, котры, окрем народных танців і музыкы, своіма выступами надают михалівскій ватрі лемківского, патріотычного характеру.

Но-ле, пізрийте на залучений долов афіш, найдете гын назвы декотрых выконавців. Як заявляют орґанізаторы, неодолга на офіцийным сайті Лемківской Ватры на Чужыні Михалів 2015 явит ся детальний проґрам XXXV Лемківской Ватры, враз з описами выконавців і другыма цінныма інформациями.

Того рока, подібні як в попередніх, Стоваришыня Лемків як орґанізатор той імпрезы, зрыхтувало для ватрян ріжны конкурсы і розрывкы. О єдным з них інформували сме за тым мотузком. Кєд лем мате дяку долучыти і спрібувати своіх сил в конкурсі на знаня Лемковины, не дайте ся за долго просити!

XXXV Лемківска Ватра на Чужыні Михалів 2015 жде ВАС!