Акцептація языковых прав є ґаранційов розвитку меншын

0

Уповномоченый влады Словацькой републікы про народностны меншыны і етнічны ґрупы Ласло Буковскый видить найвекшу ґаранцію існованя і укріпліня ідентічности членів народностных меншын в охороні їх материньского языка. Уповномоченый як порадный орґан словацькой влады з цільом зліпшіня хоснованя языків народностных меншын зробив дакілько актівностей, о котрых в середу, 17-го мая 2017-го року, інформовав медії. Офіціална пресова справа была публікована і на сайті уповномоченого.

В смыслі Проґрамового выголошіня влады Словацькой републікы на рокы 2016 – 2020 ся влада в области меншыновой політікы завязала, же на основі аналізы сотворить условії про гармонізацію практікы хоснованя меншыновых языків з платнов леґіслатівов. Уповномоченый тот крок оцінив позітівно, бо то за його думками уможнює встановити новый погляд і наштартовати серію сістемовых рішінь в тій области.

Як інформує сайт уповномоченого, кінцьом минулого рока Уряд уповномоченого вєдно із Урядом влады зробили велике анкетове досліджіня на уровни верейной справы, жебы мати комплексный, детайлный образ о актуалнім стані хоснованя языків народностных меншын. Здобыты інформації были обсягом документу, котрый окрім комплексных даных ідентіфіковав і конкретны дефіціты в аплікачній практіці. Зато влада дала уповномоченому, жебы зліпшыти сітуацію, конкретны задачі.

На основі здобытых інформацій од самосправовань і містной державной справы были зосумарізованы конкретны недостаткы і зробили ся білатерлны їднаня з міністерствами і далшыма державныма урядами, жебы недостаткы были вырішены. Предметны їднаня закінчів уповномоченый минулый тыждень.

„Передав єм спискы дізнаных ся недостатків аплікачной практікы закона о хоснованю меншыновых языків на окремых орґанах односного міністерства респ. на далшых урядах і договорили сьме ся на сполочнім поступі їх вырішіня і можливости даваня методічной і фаховой помочі,“ повів Буковскый.

Уповномоченый про народностны меншыны кінцьом минулого рока ословив 578 сел і міст, де ся нашли недостаткы. Апеловав на них, жебы їх направили і єдночасно їм на то дав часовый гармоноґрам. Буковскый підкреслив, же кідь є цільом Словакії, жебы меншыновы языкы всокотили ся і мали стабілне місце в словацькій демократнічній сполочности, пак є потрібне в кооперації з уплатніньом вже існуючіх прав наповнити іщі много задач, включно сістемовых стімулів.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Поділь ся.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Лиш коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.