Голосник

«Акция Вісла в 1947 р. выгнала з рідной землі Лемків і Украінців…» – Михалів упамятнил річницю акциі Вісла

0

21. листопада/новембра 2017 р., в ден св. Михала Архангела, в Михалові на чужыні прошло посвячыня пропамятной таблиці, яку одкрыто в рамках упамятніня 70. річниці злочынной акциі Вісла. Дата подіі была повязана з місцевым парохіяльным святом. Михалівска церков є під покровительством як раз св. Михала.

Торжественне посвячыня довершыл владыка вроцлавско-щеціньской єпархіі, архієпископ Юрий, якій того дня святочну літургію очелил в Пшемкові, де тіж находит ся храм св. Михала. Одтамале владыка довєдна зо священниками пішол до Михалова, де о 16.00 год. зачали ся богослужыня.

Владыку Юрия на порозі михалівской церкви перший раз витал староста – Осиф Лучковец. Высокопреосвященний Владыко! Радіст велика для нас і велика чест витати Вас в нашій скромній, але близкій нашым серцям церковци під покровом св. Архангела Михаіла, котрого ден днес святкуєме. Витаме Вас на чужыні, на котрій сотворили сме кавальчык нашой коханой Лемковины. Єст лемківска церковця, придорожна капличка, пропамятны таблиці і амфітеатр, де проходят Лемківскы Ватры. Завдякы нашій безграничній любови до Лемковины сохранили сме свою віру, язык, культуру та обычаі. Просиме Вас, Владыко, о молитвы перед престолом Всевышнього Господа Бога о упокоєніє душ помершых на чужыні жертв акциі Вісла. Просиме Вас тіж о посвячыня пропамятной таблиці. Най тота таблиця буде символом памяти о тых, котры не зо свойой волі мусіли лишыти рідну землю і ту зачати нове жытя. Слава Ісусу Христу! – выголосил староста.

Перше в храмі владыка Юрий при участи оо. Славомира Кондратюка з Рудной, Любомира Воргача з Ліґниці, Славомира Сороканича зо Студзьонок, Петра Соколовского з Вроцлавя, Юрия Малиша з Михалова і Зимной Воды, Григория Цибульского з Вроцлавя та о. діакона Мєчыслава Олеснєвича завершыл панихіду за жертвы акциі Вісла і лаґру в Явожні. Особливо в тот ден і в тій церкви молитвы были заношены в памят покійных Михалівян (Лемків та Украінців), якы по выселіню в 1947 році спочали на чужыні. Присутний был гостинні тіж о. Адам Кондратюк з Ішпаніі.

По панихіді вірны перешли до капличкы св. Лазаря, што ся находит поблиз церкви. Там, при ново поставленым камени, на якым поміщенo пропамятну таблицю, прошло єй посвячыня. Таблиця задумана была михалівскыма прихожанами. Думкодавці рішыли поставити ю при капличці та камени з першом михалівском таблицьом, яку 20 років тому в рамках упамятніня 50. річниці выгнаня поставил бл. п. Михал Романяк.

На таблици находит ся інскрипция споминаюча выселенців з Лемковины та Холмщыны, якы были оселены в Михалові. Під ньом поміщено выімок з верша М. Романяка.

Акция «Вісла» в 1947 р. выгнала

з рідной землі Лемків і Украінців.

До Михалова трафили 33 родины 

з Фльоринкы з Лемковины і 21 родин 

з Жабча і Потуржына з Холмщыны. 

Мали сме щезнути 

Мали сме зникнути

Господ не допустил 

Жебы сме пропали. 

В подіі окрем місцевых прихожан участ брали парохіяне з Ліґниці, Зимной Воды, Студзьонок та дальшых місцевости. На конец вшыткы засіли до стола в парохіяльній світлици.

Долов презентуєме фотореляцию авторства Анны Рыджанич, якій красні дякуєме за присланы знимкы.


 

                                   
Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар