Біщак в новій федерациі. Перший бій початком лютого во Вроцлаві

0

Початок лютого/фебруара т.р. для любителів екстремальных спортів буде добром нагодом, жебы взяти участ в кікбоксінґовій ґали во Вроцлаві. 3. лютого/фебруара выступит на ній лемківскій файтер з Ліґниці, Павел Біщак. 

Противником лемківского заводника буде Француз камеруньского походжыня, Мабель Абдалляг, якій в своій карєрі досягнул уж мена Чемпіона Світа в К-1 федерациі WAKO, як і Muay Thai. Його дотеперішні боі та добра техніка бою, свідчат про тото, што не буде він легкым противником для Павла Біщака.

Ґаля, яка пройде во вроцлавскій гали Орбіта, буде першом ґальом Біщака, в якій возме він участ як новий файтер дружыны DSF Kickboxing Challenge. До той поры заводник был повязаний з федерацийом FEN. Новорічний трансфер в світі кікбоксінґу є представляний як подія, яка потверджат, што Біщак долучыл до найліпшой федерациі промуючой тот вид спорту в Польщы. З підписаного контракту выходит, што в новій федерациі Біщак выступит найменьше штырі разы. 

– Мельдую ся в DSF Kickboxing Challenge! Ждут ня новы вызваня і можніст провірити ся з вартістныма противниками, бо про тото впевнили ня в новій федерациі. Хочу ся міряти з найліпшыма файтерами на найвысшым рівни, выявил в короткій реклямі Павел Біщак. 

Лемківскій, днес 32-літній, файтер з Ліґниці, маючы 10 років зачал тренувати в ліґницкых осередках бойовых спортів (карате кіокушін, кікбоксінґ). Од тамтой поры досягнул м.ін. званя Чемпіона Европы WKN,  Чемпіона Польщы K-1 та Чемпіона Світа федерациі Global. Дотеперішні выступы в федерациі FEN принесли му успіх в катеґориі чемпіона пілсередньой вагы. 

Павел Біщак на своім фейсбуковым фанпейджы написал, што нетерпеливо жде на бій з Франзуцом. Тепер полна концентрация і рыхтуваня – дополнил. 

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2018. Вшыткы права застережены.