Голосник

Давна Матієва

В найблизший четвер, 26. липця/юлия, в Матієвій при Санчы орґанізувана буде прогулька тым західньолемківскым селом. Сандецкій Штетль, будучий орґанізатором історичной стрічы, хоче приближыти участникам основны інформациі повязаны з Матієвом. Подію присвячат ся памяти жертв акциі Вісла.

19. історична прогулька зачне ся при церкви Покровы Пресвятой Богородиці, хоснуваній по выгнаню Русинів як римокатолицкій костел. Oд год. 17.45 участникы подіі годны будут звидіти деревяний храм, якій побудувано в 1830 р., та поблизкій цмонтір. На теметові заховало ся пару лем лемківскых камінных памятників і сут они розсіяны серед днешніх гробів жытелів Матієвой.

Провідничком по селі буде Целіна Цемпа, активістка Товариства Любителів Лабівской Землі, нагороджена пару років тому ціном Амбасадора Лабівской Землі. Поведе она заінтересуваных по стежках того вельокультурового села, котре до войны было заселене в більшости Русинами, якы в згоді жыли з поєдныма родинами інчых нацийональности.

Матієва то єдно з найдале на захід положеных сел Лемковины. Дальше находит ся лем острів Шляхтівской Руси. З єдного боку сусідує з лемківскыма селами (Лабова, Чачів, Складисте), а од пілнічного заходу з польскым селом Фрицова. До Нового Санча з Матієвой є 14 км. Місцева грекокатолицка церков з ХІХ ст. то тип західньолемківского храму (часом клясифікувана як пілнічно-західній тип), в котрым найти мож первістний іконостас, розпис, престіл і дальшы іконы, датуваны на рокы побудуваня святыні.

Попередня, успішно проведена прогулька проходила влони в поблизкій Лабовій. Так само вела ю Ц. Цемпа, представляючы найцікавшы закутины села. В історичній стрічы брал участ шефредактор ЛЕМ.фм, Богдан Ґамбаль.

Орґанізаторы акциі найблизшу прогульку путями Матієвой присвячают жертвам выгнаня 1947 р. В наслідстві акциі Вісла і проведеных в 1940-45 рр. переселінь до Росиі (УССР), село стало порожнє од автохтонів. Днес заселят го выключно польскє населіня.

фот. Нацийональний Цифровий Архів

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі