Голосник

Ден Русинів на Лемковині

В 101. річницю нацийонального віче во Фльоринці, котре рішыло покликати Начальну Раду Лемковины і было основательным актом Руской Народной Республикы Лемків, Стоваришыня «Руска Бурса» в Ґорлицях освятило сесу дату, як маючу основне значыня до будуваня цілоруснацкых спільных стремлінь і доказаня єдности.

5. грудня/децембра тр. радийо ЛЕМ.фм высылало специяльны патріотичны проґрамы, а на порталю явила ся статя ред. Северияна Косовского пн. «Днес Нацийональне свято Русинів в Польщы».

Од 2015 р., коли то была одкрыта в Рускій Бурсі в Ґорлицях пропамятна таблиця в чест Александра Духновича, будителя Карпатскых Русинів, єст принятым вказати на головный постулят Начальной Рады Лемковины на основі ідеовой спільноты і языка робити єден політичный проєкт, котрый мал бы быти сопоставленый з трьох рівных і неподільных части Карпатской Руси: Лемковины, Пряшівской і Підкарпатской Руси. І того рока найважнійшым пунктом свята было поклоніня ся Будительови Русинів. В суботу, 7. грудня/децембра, ведучый Стоваришыня Руска Бурса, Богдан Ґамбаль з делеґацийом Русинів з Пряшова положыли вінец од Лемків і запалили свічкы на памятнику Александра Духновича.

памятник Александра Духновича в Пряшові

О ден скорше, 6. грудня/децембра, Стоваришыня Руска Бурса было прошене до участи в драматичным спектаклю в Левочы. Ансамбль FS Ruthenia представлял проґрам про оптациі Русинів на Украіну пн. «Земля обіцяна». Головны креациі в представліню сотворили: «реоптант» – Осиф Пантлікаш і Владимир Чема, котрый грал аґітатора, попа, вояка і почтаря. Інсценізация была придумана Петром Штефаняком і реалізувана FS Ruthenia з Братиславы. Грала капеля Радослава Кертіса.

Земля обіцяна

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі