Голосник

Грдза в фіналі телевізийного шоу ČESKO SLOVENSKO MÁ TALENT. Перемогли зо словацко-русиньском співанком!

Недільний вечер, 21. листопада/новембра т.р., зродил радіст серед фанів русиньской культуры цілого світа. То за справом словацко-русиньского ансамблю «Грдза», котрий переміг пілфіналовы змаганя в телевізийным шоу ČESKO SLOVENSKO MÁ TALENT. Тым самым знана штораз шырше медженародна ґрупа з Пряшова перешла до фіналу чешско-словацкого шоу.

Проґрам, котрий своі одповідникы має і в інчых державах світа (прим. в Польщы зове ся Mam Talent), складат ся з парох етапів, в котрых знаных четверо юрорів оцінят выступуючых, рішаючы о дальшым авансі до наступных етапів. «Грдза» перемогла вшыткы попередні, все будучы высоко оцінюваным ансамбльом (в чвертфіналі отримали вшыткы штырі голосы юрорів). З прашівском ґрупом од деякого часу як солистка і гушлярка выступує добрі знана в Польщы Сусанна Яра, котра справила, же ансамбль попри словацкым і русиньскым реператуарі зачал співати тіж по польскы і украіньскы. Тепер уж явялт ся він істо медженародным.

Во вчерашнім пілфіналі «Грдза» запрезентувала ся зо словацко-русиньском співанком «Taka sa mi páči / Така ся мі любить». То неоцінений акцент, смотрячы під взглядом розвитку і шыріня русиньского языка в ґлобальным просторі, котрий вызначают телевізия і інтернет (трансмісию нажыво мож было позерати в сіти). Як на свіжо повіл нам лідер ансамблю – Славомир Ґібарті: заспівали сме співанку «Така ся мі любить» так як все – значыт я по словацкы, а Сусанна по русиньскы […]. Был єм кус постресуваний, подібні як інчы члены ґрупы, але наша солистка ани кус – додає Ґібарті.

ČESKO SLOVENSKO MÁ TALENT то шоу, в котрым презентувати ся можут не лем музычны ґрупы, але каждий жанр артистичного кумшту, коли лем буде вызнаний членами жырі цікавым і гідным презентациі в дальшых етапах проґраму. Хоц, як раз, тот проґрам може принести «Грдзы» великій успіх, котрий пак перенесе ся на популярніст, лідер ансамблю потвердил, же […] не єст то радше конкуренция про нас, але барз ся нам тото вшытко любит! Сусанна Яра звернула увагу на перфекцийну лоґістику і орґанізацию шоу та очывидно професийональний підхід цілой проґрамовой команды взглядом выступуючых.

Фінал 6. сериі чешско-словацкого шоу ČESKO SLOVENSKO MÁ TALENT одбуде ся в слідуючу неділю (27.11). По перемозі в пілфіналовых змаганях, члены ансамблю вернули домів, але уж в найблизший четвер зас зыйдут ся в Братиславі, жебы помаленькы рыхтувати ся до недільного выступу, котрий може принести ім гейбы найбільший успіх в карєрі.

Того рода проґрамы добрі познали уж Русины в Польщы, предовшыткым за справом выграной Ігоря Гербута і його ансамблю «ЛемОН» в популярным в польскій телевізиі шоу – Must be the music. Його примір істо вказує, же перемога в того рода проґрамах дає можніст зробліня великой карєры в сучасным музычным світі.

Выграня проґраму не єст лем залежне од оціны штыріособового жырі. В проґрамі важны сут голосы оддаваны обзераючыма через SMS. То власні публика має точно рішати про тото, хто подля них повинен остати новом звіздом чешско-словацкой попкультуры. За тым мотузком од 00:43:20 можете пізрити на выступліня «Грдзы» в пілфіналі реченого шоу.

фот. горі: скрін з выступу – видочний номер під котрий буде мож голосувати на «Грдзу» в недільным фіналі.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі