Голосник

Капличкы з Мoхначкы і Війковой будут ревіталізуваны

0

Початком мая т.р. самоуряд малопольского воєвідства поділил грошы з ґранту на ратуваня капличок з обшыри Малопольщы. Серед обєктів, котры в рамках проєкту будут ревіталізуваны, находят ся капличкы з двох сел Лемковины.

Грошы переданы в конкурсі ідут з ґранту Капличкы Малопольщы, про котрий писали сме на етапі внескуваня. Того рока на ратуваня материяльной спадковины реґіону переданых є бл. 3,15 мілийона зл. За таку суму буде одреставруваных 195 обєктів, в тым 75 капличок. Подана квота є зрахувана з інчым проґрамом, завдякы котрому сут ревіталізуваны м.ін. лемківскы церкви, камінний памятник Розалиі і Константина Жыдяків на теметові в Чорным та колекция кіриличных стародруків Єпархіяльного Осередка Православной Культуры «Елпіс» в Ґорлицях. В лютым/фебруарі были на тоту ціль приділены грошы з конкурсу Охорона забытків Малопольщы.

Дві лемківскы капличкы, якы будут ремонтуваны, находят ся в Мoхначці Выжній (7000 зл) та Війковій (8000 зл). В Мохначці буде ревіталізувана капличка Розпятя Ісуса Христа, а в Війковій продолжаний буде другій етап консервациі. Тепер реставруваны будут статуя Пресвятой Богородиці та ікона Святой Родины і св. Миколая з муруваной капличкы з перелому XVIII/XIX ст.

фот. війковска церков свв. Космы і Даміана. Знимка з цифрового архіву Єжи Тура і Барбары Тондос

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар