Композиторскій концерт Дариі Кузяк

0

Лемківска музыка штораз частійше є інспірацийом для творців. 17. листопада/новембра т.р. пройде композиторскій концерт, вчас котрого авторскій твір як раз інспіруваний лемківском нутом запрезентує молода Лемкыня, Дария Кузяк, студентка Музычной Академіі во Вроцлаві. 

Вчас композиторского концерту, в якым участ возме Дария Кузяк, вызвучат творы студентів Науково-Артистичного Кружка Композициі і Теориі Музыкы МА во Вроцлаві. Дария Кузяк є студентком І рока специялізациі Композиция i Теория Музыкы вроцлавской Музычной Академіі ім. Кароля Ліпіньского і перший раз в своій карєрі представит авторскій твір. Буде то твір інспіруваний лемківском музыком на смычковий квартер. Дария Кузяк покля што не хоче здраджати нич більше. 

Як про редакцию повіла початкуюча композиторка – […] загально твір хочу дедикувати своім предкам переселеным вчас акциі Вісла та родичам, завдакы котрым знам своє коріня і культуру. Твір, што буде запрезентуваний 17. листопада/новембра т.р., был написаний Дарийом Кузяк піл рока тому вчас вступного еґзаміну до академіі. Был єдным з трьох, з якыма мусіла ся вказати кандидатка. Николи перше твір мном скомпонуваний не был публичні выконуваний – додає Кузяк. 

Дария Кузяк в 2016 році писала матуральний еґзамін з лемківского языка. З тым почестным досягніньом вяжут ся дальшы спомины студенткы. Рекрутацийну комісию барз заінтересувало моє лемківскє походжыня, но і матура тіж. […] виділи, же єм здавала лемківскій язык, та пак зачали звідувати ся про Лемків […], хотіли, жебы-м дашто більше розповіла про нас. Пак, коли єм написала тот твір, но то уж чысто збільшыло ся заінтересуваня лемківском темом – дополнят Кузак. 

Д. Кузяк грат і в ЛАПіТ «Кычера» з Ліґниці та є членкыньом нового молодіжного ансамблю н’лем folk, дебют якого проходил вчас тогорічной Лемківской Ватры на Чужыні. В ансамбли н’лем folk Дария Кузяк пише аранжы.

Композицию вчас композиторского концерту грати будут: Мая Фурманьска – першы гушлі, Аґнєшка Русєцка – другы гушлі, Домініка Ґарнцаж – альтівка, Філіп Турковскій – басчата.

Концерт зачне ся o 18.00 год. Вступе дармо. Деталі про резервацию місц – за мотузком

Share.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.