Голосник

Кристина Черні запрезентує книжку о Новосільскым

0
В найблизшым тыжни, 28. марця 2019 р. в Кракові пройде презентация найновшой книжкы Кристины Черні, присвяченой тым разом опрацуваню творчости в пілнічных і східніх частях Польщы артисты лемківского походжыня, проф. Юрия Новосільского. Книжка «Новосільскій – сакральна штука. Підляша, Вармія, Мазуры, Люблин» то такой продолжыня першого тому, в якым представлена была творчіст артисты на обшыри Малопольщы.

Стріча зачне ся о 17.00 год. в просторах Ягайлоньской Бібліотекы. Слово выголосит і сама авторка, К. Черні, біоґрафка і дослідничка творчости Новосільского. В опрацуваню зберегла документацийну творчіст  на обшыри сучасных воєвідств підляшского, варміньско-мазурского та люблиньского. Єст она другым томом детального представліня спадковины по Новосільскым. Першый з них, пн. «Новосільскій в Малопольщы. Сакральна штука» выданый был в 2015 р.

В презентуваным альбомі найти мож цикль історичных описів і іконоґрафічных аналіз та близко 600 фотоґрафій, в тым і архівальных, на якых видіти мож вельо уж неістнуючых обєктів – або перемалюваных, або знищеных. То форма каталоґу, в якым найти мож дотля нестрічаный вид опрацувань деякых обєктів вытвореных артистом.

На краківскій презентациі окрем авторкы возмут участ та заберут голос і дальшы гості, м.ін. ученик Новосільского, Кжыштоф Клімек, директор Музею Ікон в Супрашли – Одділіня Підляшского Музею, Ева Залевска і поета Адам Заґаєвскі.

Подібна промоцийна стріча пройде пізнійше – 11. квітня/апріля т.р. в Варшаві. На подію просит Музей Варшавской Архієпархіі Римокатолицкого Костела та Підляшскій Музей в Білымстоці. На варшавскій стрічы, подібні як на краківскій, окрем авторкы в дискусиі голос заберут запрошены гості. А будут то проф. Катажына Хрудзімска-Угера, директор Інституту Істориі Штукы Університету Кардинала Стефана Вышыньского та др. Катажына Якубовска-Кравчык з Катедры Украіністикы Варшавского Університету. Промоция пройде в архієпархіяльным Музею о 17.30 год.

Книжку з творчістю Ю. Новосільского буде мож придбати на реченых двох стрічах, або уж тепер є она доступна м.ін. на сайті Підляшского Музею в Білымстоці. Реченый музей, парарельно до выданя книжкы, зорґанізувал і выставу «Новосільскій. Маляр – Філософ – Теолоґ». Выставу фурт мож видіти в музейных просторах. Представлят проєкты і сакральны ескізы автора. Цікавіст можут родити предовшыкым тоты проєкты, якы николи не были зреалізуваны, а лем задуманы і робочо розписаны. Причыном такого стану был факт, што його проєкты являли ся одважныма, одкрытыма і не все были акцептуваны, смотрячы з перспективы традицийных канонів іконописаня. На выставі вказаны сут тіж свобідны запискы Новосільского, якы не односят ся конкретно до даного місця ци твору, яле вказуют на його глубокы передуманя і авторску візию. Промоция книжка на Підляшы прошла 20. лютого/фебруара в Супрашльскій Академіі.

Авторка опрацуваня, Кристина Черні, знана єст шырше з того, што свою науковы дослідныня посвячат як раз творчости Новосільского. Єдным з єй значучых діл єст біоґрафія артисты «Мышпергач в святыни. Біоґрафія Юрия Новосільского», за котру в 2012 р. оцінено єй нагородом літерацкого місячника Новы книжкы. За біоґрафію номінувана была і до Літерацкой Нагороды Ґдыня 2012 та нашла ся в фіналі престіжной Літерацкой Нагороды Ніке. В 2017 р. оборонила докторску дисертацию на Ягайлоньскым Уніерститеті – «Концепция сакральной штукы Юрия Новосільского». Том про Підляшя, Вармію, Мазуры і Люблин то не конец. Авторка плянує зрыхтувати дальшы опрацуваня.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар