Криціньского стрічы з Лемковином

2

Протягом трьох дни в січни/януари 2018 р. пройдут стрічы з автором новой лемкознавчой публикациі, Станіславом Криціньскым. Писменнник запрезентує свою нову книжку «Лемковина. Час войны і миру». 

Перша з авторскых стріч пройде 16. січня/януара 2018 р. в книгарни Лібра в Ряшові. 17. січня/януара автор выголосит доповід нт. свойой публикациі в ґалериі Дворы Карвациянів в Ґорлицях, а третього дня (18.01) циклю стріч з книжком і єй автором буде мочы зыйти ся в Сандецкым Штетли в Новым Санчы. 

«Лемковина. Час войны і миру» то продолжыня печатаной два рокы тому книжкы пн. «Лемковина по обох странах Карпат». Найновша книжка выдавництва Лібра приносит чытачам інформациі з істориі Лемковины, зачынаючы од 30. років ХІХ ст. по 1939 рік. Криціньскій представлят народины народового руху серед Русинів Лемковины, початкы лемківской літературы, подіі Великой Войны і репресиі, што впали на Лемків, інтеліґенция якых была поневолена в Талергофі. Дальшы розділы книжкы то опис воєнных цмонтери, якы сут густо розсіяны по Лемковині, справа конверсий до православя, покликаня Апостольской Адміністрациі Лемковины, жытя на лемківскым селі та ремесло. 

Станіслав Криціньскій, хоц має хімічну освіту, од років занимат ся історийом і краінознавством – головні обшыри Карпатскых Гір. Є він автором чысленных публикаций, написал м.ін. «Деревяны церкви в Карпатах», «Бєщады. Історично-краінознавчий словник» (дві части), «Перемышль і Перемышльскє Погіря», «Церкви в Бєщадах». Вартістне, што автор переказує тото, же од 70. років XX ст. пенетрувал обшыр Бєщад, Лемковины та Погіря, документучы світ, котрого уж неє. «Лемковина. Час войны і миру», яка продолжат оповіст про Русинів з Лемковины, є його послідньом книжком. В ній автор пише про історию перелому ХІХ і ХХ ст. Зас попередня книжка – «Лемковина по обох странах Карпат» є історично-культуровом вандрівком од часів заселіня Карпат по половину ХІХ ст. 

 

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

2 Comments

  1. Севериян Косовскый
    Севериян Косовскый on

    Ніт. Автор лем занимат ся лемківском темом.

  2. Viktor

    Вызерать красна книжка. Автор є Русином може тыж ?

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2018. Вшыткы права застережены.