Голосник

Лемківскы активісты одобрали медалі од нижньошлезского воєводы

0
7. червця/юнія 2018 р. во Вроцлаві вручены были одзначыня наданы Президентом Польской Республикы та Міністром Культуры і Нацийональной Спадковины. Медалі передавал нижньошлезскій воєвода Павел Греняк. Серед угоноруваных ордерами нашли ся і лемківскы активісты.

Воєвода передал золоты, срібрны і бронзовы Кресты Заслугы та медаль Заслужений Культурі Gloria Artis. Золотий Крест Заслугы, наданий президентом Анджейом Дудом, воєвода Греняк вручыл Ярославови Горощакови, лемківскому діячови, творці першого лемківско-польского словника. Одзначыня передане было за заслугы в обшыри соспільной діяльности для плеканя нацийональной достоменности Лемків. Ярослав Горощак святкує того рока 70. річницю народжыня. Был спілосновательом Лемківской Ватры, артистом ансамблю Лемковина з Білянкы та спілосновательом і активным діячом Стоваришыня Лемків.

Дістал єм Золотий Крест Заслугы, наданий през Президента, але так направду то наданий през мого шефа, шефа Стоваришыня Лемків, бо то він внескувал, і воєводу. А президент то відомо, підписує, неконечні знат певно кому. Крест єм отримал за діяльніст на ниві лемківской культуры, але думам, што тіж і за працу, бо як раз мам 50 років роботы, бесідує Я. Горощак.

Другом кандидатуром зголошеном Стоваришыньом Лемків была кандидатура Євгена Габуры. Бронзовий Крест Заслугы одобрал він як член Головного Заряду Стоваришыня Лемків та ведучий Кружка СЛ в Пшемкові. Ордер вручений был за заслугы в обшыри розвитку культуры Лемків, орґанізуваня шторічной культурной подіі «Стрічы Трьох Поколінь з Лемківском Культуром» та за орґанізуваня Лемківского Ансамблю Пісні і Танця «Ластівочка», якій фунґує при Кружку СЛ в Пшемкові. Є. Габура активно діє при орґанізуваню Лемківской Ватры на Чужыні.

Мария Кєлечава угонорувана была бронзовым медальом Заслужений Культурі Gloria Artis, якій признал Міністер Культуры і Нацийональной Спадковины Пьотр Ґліньскій. М. Кєлечава є єдном з невельох осіб, котры на Нижнім Шлеску трудят ся в батканю та писаню яєц подля традицийных лемківскых і гуцульскых взорів. Своі працы вельократно выставляла в Польщы і поза ньом.

Того дня угоноруваны были так само члены другых нацийональных меншын. Подія орґанізувана была Полномічником Нижньошлезского Воєводы дс. нацийональных і етнічных меншын, Юстином Маковском. Вчас ґалі выступила Репрезентацийна Оркєстра Воєвідской Коменды Поліциі во Вроцлаві.

фот. Нижньошлезскій Уряд Воєвідскій во Вроцлаві

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар