Голосник

«Молит Тя Боже русиньскій рід…» – ждыньскій крест повалений

0

Крест, якій находит ся в селі Ждыня на Лемковині, при пути на Конечну, правдоподібно пару ночы тому был повалений. Не сут знаны точны обставины його знищыня, але з проведеных консультаций з жытелями села і дугых поблизкых, дознали сме ся, же причыном знищыня креста міг быти найправдоподібнійше сильний мороз і вітер.

На жаль, по остатніх прикрых інцидентах нищыня таблиц з лемківскыма назвамы сел (знищено м.ін. лемківску част назвы села Ґладышів, якє сусідує зо Ждыньом) на мысель приходят і дальшы припущыня, ци часом дахто го не знищыл, понеже нищыня трираменных крестів ставляных Лемками іщы не так давно мало місце, а при тым і крадежы желізных части крестів. Єднако, таку гіпотезу радше в тым примірі треба одшмарити – на што звертают увагу і самы селяне.

Ждыньскій крест был поставлений в 1996 році, о чым свідчыла єдна з дат на таблици. Інскрипция, яка ся під крестом находила, являла ся патріотичном апострофом до Господа Бога о спокій од всякых бід i о час, коли Русины з Лемковины зас будут в себе. Крестне знамя уфундовал бл. п. Михал Сандович (1939-2003) – внук священномученика Максима Ґорлицкого, на земли, яка до 1947 рока належала до роду Сандовичів, а пак в 1996 році была ним одкуплена.

Ци і коли, а предо вшыткым хто займе ся направом креста – покля што не знатя.

Інскрипция, знимка зроблена літом 2015 р.; фот. архів ЛЕМ.фм

Крест перед знищыньом, літо 2015; фот. архів ЛЕМ.фм

Долов поміщаме стан знищеного креста. Фотоґрафіі про редакцию выконала Анна Шмайда.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар