Голосник

На Малых Ґавронах прошла новорічна стріча з Розтоком. Засідал і ГЗ СЛ

0
Традицийно лемківскій фольклорный ансамбль Розтока орґанізувал свою новорічну стрічу. Концерт і гостина одбыли ся в послідню суботу, 2. лютого/фебруара 2019 р., в Ґавронках близко Рудной, або як Лемкы доднес повідают – на Малых Ґавронах. Там же, в сельскій світлици, яка єст місцьом проб ансамблю, Розтока приняла своіх гости. Наперед концерту в тым місци засідал Головный Заряд Стоваришыня Лемків.

Подія зачала ся о 17.00 год. Отворил ю ведучый ансамблю, а од недавна і шеф місцевого Кружка СЛ, Владимір Зорило (за тым мотузком чытайте архівальне інтервю з В. Зорило). В своім повитальным слові поздоровил прибывшых, в тым заприязненый ансамбль Собиняне зо села Собин при Польковицях. Найперше свій выступ дала Розтока, яка знана єст з того, што через спів і музику хоче вказувати на тото, што лучыт м.ін. Лемків і Поляків. Членами колективу сут так Лемкы, як і Полякы, в більшости творят го жены – Лемкыні, якы не лем того дня выступували, але і зрыхтували про участників подіі смачну вечерю. Розтока заспівала пару своіх пісен, так лемківскых, як і польскых, якы м.ін. годны сме слухати на іх – єдиным до той поры – цедечку.

Пак зо своім репертуаром вказали ся Собиняне. Подібні як приятелі з Розтокы, ансамбль тот в своій творчости односит ся до польскых і лемківскых пісен. Пару родин по выселіню замешкало як раз в Собині, о чым доднес памятают члены тамтышнього колективу, підтримуючы меджекультуровы одношыня.

Не долго треба было ждати, жебы присутных запросити до спільной забавы. Найперше на середину вышли гудакы, а серед них нестор лемківской гры на гушлях, маючый 97 років, Владимір Олеснєвич родом з Перункы. Пригрывали му молодшы лемківскы гудакы, члены лемківскых ансамблів. Внет долучыл і спів.

В Ґавронках засідал ГЗ СЛ

Наперед новорічного концерту в Ґавронах засідал ГЗ СЛ. Од недавна – як раз в Ґавронках – фунґує наймолодшый кружок орґанізациі. Головном темом зобраня была бесіда над скликаньом VIII Kонґресу орґанізациі. Рішено, што конґрес пройде 6. квітня/апріля 2019 р. в Ліґници. Будут товды выбераны новы власти на дальшу каденцию, якы реалізувати мают пляны і заміры на найблизшы рокы. Старый заряд і його ведучый дадут справопис з діяльности за рокы 2015-2019. Пак внескувати будут од делеґатів абсолюториі. Выбераный буде і контрольный орґан – Головна Ревізийна Комісия. Єдном з важнійшых тем має быти проблем змін в статуті та выборы нового ведучого, о кілько старый предсідатель – Андрий Копча, рішыт не кандидувати. По квітньовых выборах єдном з першых векшых задач нового заряду буде орґанізация дальшой Лемківской Ватры на Чужыні. Так само ведучый вєдно з членами Стоваришыня Лемків возмут участ як делеґаты в найблизшым XV Світовым Конґресі Русинів, якій пройде в дн. 5.-7. липця/юлия в Старій Любовни в Словацкій Республиці.

Долов публикуєме фотореляцию зо стрічы. Знимкы Мирослава Воргача.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар