Голосник

Нововыбрана шолтыска в Розділю

Мило нам поінформувати, же наша редакцийна колежанка Моніка Тылявска (по лемківскы “окрещена” іщы вчас студий на лемківскій філолоґіі як Настка) 17. лютого 2015 р. по сельскым зобраню, скликаным війтом ґміны Липинкы, в тайным голосуваню, остала выбрана спосеред 3 кандидатів на шолтыску села Розділя.


Моніка Тылявска (нар. 7. квітня 1985 р.) основну і середню школу кінчыла в Ґорлицях, пак в 2010 р. скінчыла росийску філолоґію з русиньско-лемківскым языком на Педаґоґічным Університеті в Кракові і подипломовы студиі з обшыри заряджаня безпеком і гіґієном роботы. В роках 2012-2013 учытелювала в ґорлицкым ліцею ім. М. Кромера, а в 2013-2014 была інспектором в ґорлицкій Фабрыці Машын. Занимат ся тіж тлумачынями і роботом в обшыри лемківского языка. Спілпрацує з портальом terazgorlice.pl.

Од самого початку (2011) діє в радию лем.фм, нагрываючы проґрамы: едукацийны (лекциі лемківского языка), слуховиска для дорослых і для діти, концерты желань, часом дашто поплете (“Што Настці по голові ходит?”), а од того рока можете почути єй голос в высыланях лем.фм нажыво (понедільок і середа рано). Єст тіж редакторком нашого порталю lem.fm.

Желаме успіхів в новій діяльности!

Monika Tylawska

Моніка Тылявска

 

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментарі